അടൂര് : അടൂര് എം.സി. റോഡില് മൂടിയില്ലാത്ത ഓട അപകട ഭീഷണി ഉയര്ത്തുന്നു. എം.സി. റോഡില് മലങ്കര പള്ളിക്ക് സമീപം ഡോക്ടേഴ്സ് കണ്സല്ട്ടിങ് സെന്ററിലേക്ക് ഇറങ്ങുന്ന ഭാഗത്താണ് അപകടകരമായ ഓട. ഓടയ്ക്ക് സ്ലാബ് ഇടാത്തതാണ് അപകട മേഖലയായി മാറാന് കാരണം. കഴിഞ്ഞ ദിവസം രാത്രി ശൂരനാട് സ്വദേശി രാജേഷ് മകളെ ഡോക്ടറെ കാണിച്ച ശേഷം ബൈക്കില് പോകവേ ഈ അപകടകരമായ കുഴിയുടെ മുകളിലേക്ക് മറിഞ്ഞിരുന്നു. കുട്ടി അടൂര് ഗവ. ആശുപത്രിയില് ചികിത്സയിലാണ്. കാലിന്റെ മുട്ടിന് ഭാഗത്ത് വലിയ ക്ഷതമാണ് സംഭവിച്ചത്. അപകട സമയത്ത് രാജേഷ് മകളുടെ കാലിന്റെ മുകളില് പിടിച്ചു കിടന്നത് കൊണ്ട് കുഴിയിലേക്ക് വഴുതി വീണില്ല. തലയിടിച്ചാണ് രാജേഷ് വീണത്. ഹെല്മറ്റ് ധരിച്ചിരുന്നതാനാല് വലിയ അപകടമാണ് ഒഴിവായത്.
ഓടയോട് ചേര്ന്ന് പി.ഡബ്ല്യു.ഡിയുടെ കലുങ്ക് ഉണ്ട്. കലുങ്കിന്റെ കല്ക്കെട്ടും തകര്ന്ന നിലയിലുമാണ്. അപകടകരമായ ഓടയുടെ ഭാഗത്തെ ഉപറോഡ് സ്ലോപ്പിലായതിനാലും ഏതു സമയത്തും ഇവിടം അപകടസാധ്യതയേറുകയാണ്. അഞ്ചിലധികം സ്പെഷ്യലിസ്റ്റ് ഡോക്ട്ടര്മാരുടെ കണ്സണ്ട്ടിങ് സെന്ററിലേക്ക് ഇതുവഴിയാണ് നൂറ് കണക്കിന് രോഗികള് ചികിത്സ തേടി എത്തുന്നത്. കൂടാതെ ജിം, മെഡിക്കല് ഷോപ്പ് നിരവധി വീടുകളിലേക്കും പോകണമെങ്കില് അപകടകരമായ ഈ ഓടയുടെ സമീപത്ത് കൂടിയേ പോകാന് കഴിയൂ. വൈകുന്നേരങ്ങളില് ഇവിടെ വലിയ തിരക്കാണ്. എം.സി. റോഡിന് സമാന്തരമായി ഓട ഈ ഭാഗത്ത് എത്തുമ്പോള് മാത്രമാണ് മൂടിയില്ലാതെ കിടക്കുന്നത്. ഡോക്ടേഴ്സ് കണ്സള്ട്ടിങ് സെന്ററിലേക്ക് റോഡ് പണി നടന്ന സമയത്ത് ഇവിടം സ്ലാബ് ഇടുമെന്ന് പി.ഡബ്ല്യൂ.ഡി അധികൃതര് ഉറപ്പ് നല്കിയിരുന്നതാണ്. എന്നാല് അധികൃതര് ഇതുവരെ യാതൊന്നും ചെയ്തിട്ടില്ല. പി.ഡബ്ല്യു.ഡി അധികൃതരുടെ കെടുകാര്യസ്ഥതക്കെതിരെ പ്രതിഷേധങ്ങളും ശക്തമായിരിക്കുകയാണ്.
