പത്തനംതിട്ട : അഡ്വ. വര്ഗീസ് മാമ്മന് തിരുവല്ലയില് യു.ഡി.എഫ് സ്ഥാനാര്ഥി. യു.ഡി.എഫിലെ ഘടകകക്ഷിയായ കേരളാ കോണ്ഗ്രസ് ജോസഫ് ഗ്രൂപ്പ് സ്ഥാനാര്ഥിയാണ് അഡ്വ. വര്ഗീസ് മാമ്മന്. തിരുവല്ലയുടെ സാമൂഹിക രാഷ്ട്രീയ ജീവിതത്തില് വിശ്വാസ്യതയും സമര്പ്പണവും കൊണ്ട് തിരിച്ചറിയപ്പെടുന്ന പേരാണ് അഡ്വ. വര്ഗീസ് മാമ്മന്. ദീര്ഘകാല പൊതുപ്രവര്ത്തനത്തിന്റെ അനുഭവസമ്പത്തും ഉറച്ച സംഘടനാ മികവും ചേര്ന്നുള്ള അദ്ദേഹത്തിന്റെ വ്യക്തിത്വം ഇന്ന് തിരുവല്ലയുടെ പൊതുജീവിതത്തില് ഒരു ശക്തമായ സാന്നിധ്യമായി നിലകൊള്ളുന്നു. കേരളാ കോണ്ഗ്രസ് പത്തനംതിട്ട ജില്ലാ പ്രസിഡന്റും യുഡിഎഫ് ജില്ലാ ചെയര്മാനുമായ അദ്ദേഹം രാഷ്ട്രീയ നേതൃത്വത്തിന്റെ ഉത്തരവാദിത്വം സേവനബോധത്തോടെ ഏറ്റെടുത്ത വ്യക്തിയാണ്.
ആത്മീയ മൂല്യങ്ങളും വിദ്യാഭ്യാസ പാരമ്പര്യവും നിറഞ്ഞ കുടുംബത്തിലാണ് അദ്ദേഹത്തിന്റെ വളര്ച്ച. മാര്ത്തോമ്മാ സുവിശേഷ പ്രസംഗ സംഘം ജനറല് സെക്രട്ടറിയായിരുന്ന റവ. പി.ഡി. മാമ്മന്റെയും തിരുവല്ല സെന്റ് തോമസ് ടിടിഎയുടെ മുന് പ്രിന്സിപ്പല് സൂസമ്മ മാമ്മന്റെയും ഇളയ മകനായി ജനിച്ച വര്ഗീസ് മാമ്മന് ചെറുപ്പം മുതല് തന്നെ സമൂഹത്തോടുള്ള ഉത്തരവാദിത്വബോധത്തോടെയാണ് ജീവിതം മുന്നോട്ട് കൊണ്ടുപോയത്. കുടുംബം നല്കിയ ആത്മീയ സംസ്കാരവും വിദ്യാഭ്യാസം നല്കിയ ചിന്താശക്തിയും ജീവിതദിശയെ നിര്ണയിച്ച ശക്തികളായി. തിരുവല്ല സാല്വേഷന് ആര്മി സ്കൂളിലും എസ്.സി.എസ് ഹൈസ്കൂളിലും പ്രാഥമിക വിദ്യാഭ്യാസം നേടിയതിനു ശേഷം തിരുവല്ല മാര്ത്തോമ്മാ കോളേജില് ബിരുദപഠനം പൂര്ത്തിയാക്കി. തുടര്ന്ന് തിരുവനന്തപുരം ലോ അക്കാദമി ലോ കോളേജില് നിന്നു നിയമബിരുദം നേടി. നിയമം ഒരു തൊഴില് മാത്രമല്ല, നീതിയുടെയും ഉത്തരവാദിത്വത്തിന്റെയും പാതയാണെന്ന ബോധത്തോടെ 1992 മുതല് തിരുവല്ല ബാറില് അഭിഭാഷകനായി പ്രവര്ത്തിച്ചു വരുന്നു. നോട്ടറിയായും സുപ്രീംകോടതി ബാര് അസോസിയേഷന് അംഗമായും അദ്ദേഹം നിയമരംഗത്ത് ശ്രദ്ധേയമായ സ്ഥാനം നേടിയിട്ടുണ്ട്.
വിദ്യാര്ത്ഥി കാലം മുതല് പൊതുപ്രവര്ത്തനത്തിന്റെ പാതയില് സജീവമായിരുന്നു. കേരളാ വിദ്യാര്ത്ഥി കോണ്ഗ്രസ് (കെ.എസ്.സി) മുഖേന ആരംഭിച്ച രാഷ്ട്രീയയാത്ര തിരുവല്ല എസ്.സി.എസ് സ്കൂളിലെ യൂണിറ്റ് പ്രസിഡന്റായി തുടക്കം കുറിച്ചു. വിദ്യാര്ത്ഥി സംഘടനാ പ്രവര്ത്തനങ്ങളിലൂടെ നേതൃത്വവും സംഘാടന മികവും സാമൂഹിക ഉത്തരവാദിത്വവും അഭ്യസിച്ച വര്ഗീസ് മാമ്മന് പിന്നീട് സംസ്ഥാനതല രാഷ്ട്രീയത്തിലേക്കും സംഘടനാ പ്രവര്ത്തനങ്ങളിലേക്കും വളര്ന്നു. കേരളാ കോണ്ഗ്രസ് പാര്ട്ടിയുടെ സംഘടനാ ശക്തി വര്ധിപ്പിക്കുന്നതില് കഴിഞ്ഞ കുറെ വര്ഷങ്ങളായി നിര്ണായക പങ്കുവഹിച്ച നേതാവാണ് അഡ്വ.വര്ഗീസ് മാമ്മന്. കെ.എസ്.സി തിരുവല്ല നിയോജകമണ്ഡലം പ്രസിഡന്റ്, ജില്ലാ സെക്രട്ടറി, സംസ്ഥാന സെക്രട്ടറിയേറ്റ് അംഗം, കേരളാ കോണ്ഗ്രസ് തിരുവല്ല നിയോജകമണ്ഡലം പ്രസിഡന്റ്, പത്തനംതിട്ട ജില്ലാ ഓഫീസ് ചാര്ജ് ജനറല് സെക്രട്ടറി, സംസ്ഥാന സെക്രട്ടറിയേറ്റ് അംഗം, ഉന്നതാധികാര സമിതി അംഗം, സ്റ്റേറ്റ് അഡൈ്വസര് തുടങ്ങി നിരവധി ഉത്തരവാദിത്വങ്ങള് വിവിധ കാലഘട്ടങ്ങളില് അദ്ദേഹം വഹിച്ചു. പാര്ട്ടി ചെയര്മാന് പി.ജെ. ജോസഫിന്റെ വിശ്വസ്തനായ സഹപ്രവര്ത്തകനായി അറിയപ്പെടുന്ന വര്ഗീസ് മാമ്മന് കഴിഞ്ഞ പാര്ലമെന്റ് തെരഞ്ഞെടുപ്പില് ആന്റോ ആന്റണിയുടെ തെരഞ്ഞെടുപ്പ് ചെയര്മാനായും പ്രവര്ത്തിച്ചു.
സാമൂഹികവും ആത്മീയവുമായ മേഖലകളിലും അദ്ദേഹത്തിന്റെ സാന്നിധ്യം ശ്രദ്ധേയമാണ്. ദക്ഷിണ കൊറിയയില് നടന്ന ക്രൈസ്തവ സഭകളുടെ അഖിലലോക കൗണ്സിലിലും തായ്ലന്റില് നടന്ന അന്താരാഷ്ട്ര സര്വമത സമ്മേളനത്തിലും ഇന്ത്യയെ പ്രതിനിധീകരിക്കാന് അവസരം ലഭിച്ചു. മാര്ത്തോമ്മാ സഭയുടെ അത്മായ ട്രസ്റ്റിയായി സേവനം അനുഷ്ഠിച്ച അദ്ദേഹം തിരുവല്ലയിലെ നിരവധി ബാങ്കിങ് സ്ഥാപനങ്ങളുടെയും സാമൂഹിക സംഘടനകളുടെയും നിയമ ഉപദേശകനായും പ്രവര്ത്തിച്ചു വരുന്നു.
തിരുവല്ലയുടെ സാമൂഹിക വികസനത്തിനും പൊതുപ്രവര്ത്തനത്തിനും സമര്പ്പിതമായി പ്രവര്ത്തിച്ച അദ്ദേഹം തിരുവല്ല ഡവലപ്മെന്റ് സൊസൈറ്റി ചെയര്മാന്, തിരുവല്ല വൈ.എം.സി.എ പ്രസിഡന്റ്, ടെലികോം ഉപദേശ സമിതി അംഗം, പുഷ്പഗിരി മെഡിക്കല് കോളജ് പി.ടി.എ പ്രസിഡന്റ് തുടങ്ങിയ നിലകളിലും ശ്രദ്ധേയമായ സേവനം അനുഷ്ഠിച്ചിട്ടുണ്ട്. സമൂഹത്തിന്റെ വിവിധ മേഖലകളുമായി അടുത്ത ബന്ധം പുലര്ത്തി പ്രവര്ത്തിക്കുന്ന നേതാവെന്ന നിലയില് അദ്ദേഹം ജനങ്ങളോടൊപ്പം തുടരുന്ന വ്യക്തിയാണ്. കുടുംബപരമായും ആത്മീയമായും സമ്പന്നമായ പാരമ്പര്യമുള്ള വ്യക്തിയാണ് അദ്ദേഹം. ഭാര്യ വൈനി വര്ഗീസ് മാമ്മന് എസ്.സി ഹയര് സെക്കന്ഡറി സ്കൂളിലെ അധ്യാപികയാണ്. മക്കള് – മാമ്മന് വര്ഗീസ് (സീനിയര് മാനേജര്, ബജാജ് – പുണൈ), ഡോ.നൈനാന് വര്ഗീസ് (ബിലീവേഴ്സ് മെഡിക്കല് കോളജ് ഹോസ്പിറ്റല്, തിരുവല്ല).
