ന്യൂഡൽഹി: മുതിർന്ന ബിജെപി നേതാവ് എൽകെ അദ്വാനിയെ പ്രശംസിച്ച ശശി തരൂരിന്റെ പ്രസ്താവനക്ക് പിന്നാലെ കോൺഗ്രസിനെ രൂക്ഷമായി വിമർശിച്ചും തരൂരിന് പരോഷ പിന്തുണ നൽകിയും ബിജെപി രംഗത്ത്. ഐ എൻ സി ഇപ്പോൾ ഇൻടോളററ്റ് നാഷണൽ കോൺഗ്രസ് ആയോ എന്നും പൊതുജീവിതത്തിൽ അടിസ്ഥാന മര്യാദ പ്രകടിപ്പിക്കുന്നത് പാർട്ടിക്ക് സഹിക്കാൻ പോലും കഴിയില്ലേ എന്നും ബിജെപി ദേശീയ വക്താവ് സി.ആർ. കേശവൻ ചോദിച്ചു.
കോൺഗ്രസിനുള്ളിലും ഗാന്ധി കുടുംബത്തിലും ആഴത്തിൽ വേരൂന്നിയ അരക്ഷിതാവസ്ഥയുണ്ടെന്നും പാർട്ടിയുടെ ഇപ്പോഴത്തെ തകർച്ചയ്ക്ക് പിന്നിലെ പ്രേരകശക്തിയായി നെഹ്റു-ഗാന്ധി പരമ്പരയുണ്ടെന്നും കേശവൻ പറഞ്ഞു. ഈ വികാരങ്ങൾ പ്രകടിപ്പിക്കുന്നതിൽ തരൂർ ഒറ്റയ്ക്കല്ലെന്നും അദ്ദേഹം പറഞ്ഞു. നെഹ്റു-ഗാന്ധി കുടുംബത്തിന്റെ അർഹതയില്ലാത്ത നേതൃത്വത്തിന് കീഴിൽ പല കോൺഗ്രസ് നേതാക്കളും ശ്വാസംമുട്ടൽ അനുഭവിക്കുന്നു. അടിയന്തരാവസ്ഥയുടെ മുൻവിധിയോടെയുള്ള, അസഹിഷ്ണുത നിറഞ്ഞ ഒരു മാനസികാവസ്ഥ മാത്രമാണ് കോൺഗ്രസ് പാർട്ടിക്കുള്ളതെന്നും വക്താവ് പറഞ്ഞു.
