ദില്ലി: 2000 രൂപയുടെ നോട്ടുകള്‍ പിന്‍വലിക്കാന്‍ പോകുന്നുവെന്ന പ്രഖ്യാപനം വന്നതോടെ രാജ്യത്തെ പലയിടങ്ങളിലും നോട്ടുകള്‍ സ്വീകരിക്കുന്നില്ലെന്ന തരത്തിലുള്ള വാര്‍ത്തകള്‍ പുറത്തു വന്നിരുന്നു. ഇപ്പോഴിതാ അത്തരത്തില്‍ പെട്രോള്‍ പമ്പില്‍ നിന്നുള്ള ഒരു വാര്‍ത്തയാണ് പുറത്തു വരുന്നത്. പെട്രോള്‍ അടിച്ച ശേഷം നല്‍കിയ 2000 രൂപ നോട്ട് സ്വീകരിക്കാന്‍ വിസമ്മതിച്ചതോടെ ജീവനക്കാരന്‍ ഇന്ധനം ഊറ്റിയെടുക്കുകയായിരുന്നു.
ഉത്തര്‍പ്രദേശിലെ ജലൗണിലുള്ള പെട്രോള്‍ പമ്പിലാണ് സംഭവം. ഇവിടുത്തെ ജീവനക്കാരന്‍ ഉപഭോക്താവിന്റെ സ്‌കൂട്ടറിലെ ടാങ്കറില്‍ നിന്ന് ഇന്ധനം ഊറ്റിയെടുക്കുകയായിരുന്നു. വാഹനത്തില്‍ ഇന്ധനം നിറച്ച ശേഷം ഇയാള്‍ 2000 രൂപയുടെ നോട്ട് നല്‍കി. എന്നാല്‍ ജീവനക്കാരന്‍ നോട്ട് നിരസിക്കുകയും തുക ആവശ്യപ്പെടുകയും ചെയ്തു. പിന്നാലെ ഇന്ധനം ഊറ്റിയെടുക്കുകയായിരുന്നു.
