പത്തനംതിട്ട : പാചകവാതക പ്രതിസന്ധിയെ തുടര്ന്ന് പത്തനംതിട്ട നഗരത്തിലെ പല ഹോട്ടലുകളും അടച്ചുപൂട്ടുകയും ചായ താത്കാലികമായി നിര്ത്തലാക്കുകയും ചെയ്തതിന് പിന്നാലെ ചൂടുവെള്ളം പോലും ലഭിക്കാത്ത അവസ്ഥയില് പത്തനംതിട്ട നഗരം. ആശുപത്രിയില് കിടത്തി ചികിത്സയിലുള്ള സാധാരണക്കാരായ രോഗികളും കൂട്ടിരുപ്പ്കാരുമാണ് ഇത് മൂലം ഏറ്റവും കൂടുതല് ബുദ്ധിമുട്ട് നേരിടുന്നത്. പല ഹോട്ടലുകളും മുന്പ് ചൂടുവെള്ളം സൗജന്യമായി കൊടുത്തിരുന്നു എങ്കില് ഇപ്പോള് പണം വാങ്ങിയാണ് പലരും ചൂടുവെള്ളം കൊടുക്കുന്നത്. ചായപോലെ തന്നെ ചൂടുവെള്ളത്തിനും പാചക വാതകം കൂടുതല് ആവശ്യമായി വരുന്നു എന്നതിനാലാണ് ഹോട്ടലുടമകള് ചൂടുവെള്ളത്തിനും പണം ഈടാക്കി തുടങ്ങിയത്.
പത്തനംതിട്ട നഗരത്തില് അടുത്തടുത്തായി നിരവധി ആശുപത്രികളാണ് ഉള്ളത്. ഈ ആശുപത്രികളില് ചികിത്സയില് കഴിയുന്നവര് പത്തനംതിട്ട നഗരത്തിലെ ഹോട്ടലുകളില് നിന്നാണ് ആഹാര സാധനങ്ങളും ചൂടുവെള്ളവും വാങ്ങിയിരുന്നത്. എന്നാല് ഇപ്പോള് ചൂടുവെള്ളത്തിന് കൂടി ഹോട്ടലുടമകള് പണം ഈടാക്കി തുടങ്ങിയത് സാധാരണക്കാരെ തീര്ത്തും പ്രതിസന്ധിയിലാക്കിയിരിക്കുകയാണ്. കെറ്റിലും മറ്റ് സംവിധാനങ്ങളും ഇല്ലാത്തവര് ബന്ധുവീടുകളെയും മറ്റും ആശ്രയിച്ചാണ് ഇപ്പോള് ചൂടുവെള്ളമെത്തിക്കുന്നത്.
ചൂടുവെള്ളം വാങ്ങുന്നതിനായി മാത്രം കിലോമീറ്ററുകളോളം സഞ്ചരിക്കുന്നവരുമുണ്ട്. ജില്ലയില് പാചകവാതക ക്ഷാമം രൂക്ഷമായതോടെ ഹോട്ടലുകള് പലതും അടച്ചുപൂട്ടി. ചെറിയ തട്ടുകടകള് മാത്രമാണ് ഇപ്പോള് പൊതു ജനങ്ങള്ക്ക് ഏക ആശ്വാസം. ചൂടുവെള്ളവും പാലും തിളയ്ക്കുവാന് മണിക്കൂറുകള് ആവശ്യമായി വരുന്നതിനാല് പാചകവാതകം കൂടുതല് ചിലവാകുമെന്നതിനാലാണ് ഇത്തരത്തില് ഒരു തീരുമാനത്തിലേക്ക് എത്തുവാന് ഹോട്ടല് ഉടമകള് തയ്യാറായത്.
