കൊച്ചി : അഡ്വക്കറ്റ് ജനറലിന്റെ ഓഫിസില് ആദിവാസി ജീവനക്കാരന് മര്ദനമേറ്റതായി പരാതി. ഇടുക്കി ജില്ലിയിലെ നന്ദനു കൃഷ്ണന്കുട്ടിയെന്ന ജീവനക്കാരാനാണ് മേലുദ്യോഗസ്ഥനായ അജേഷ് പി.ബി ക്കെതിരെ കൊച്ചി സിറ്റി പോലീസ് സ്റ്റേഷനില് പരാതി നല്കിയത്. 2019 നവംബറിലാണ് നന്ദനു ഓഫിസിലെ അറ്റന്ഡറായി ജോലിയില് പ്രവേശിച്ചത്. മേലുദ്യോഗസ്ഥന് നിരന്തരം വംശീയമായി അധിക്ഷേപം തുടര്ന്നു. ഒടുവില് മേയ് 21ന് രാവിലെ യാതൊരു പ്രകോപനവുമില്ലാതെ മര്ദ്ദിക്കുകയായിരുന്നെന്നാണ് പരാതിയില് പറയുന്നത്. മര്ദ്ദിച്ചതിന്റെ പേരില് പരാതി നല്കിയാല് ജോലിയില്നിന്ന് പിരിച്ചുവിടുമെന്നും ഭീഷണിപ്പെടുത്തിയെന്ന് നന്ദനു പറഞ്ഞു.
മേലുദ്യോഗസ്ഥന്റെ അടികൊണ്ട് താഴെ വീണ നന്ദനുവിനെ ഓഫിസിലെ മറ്റ് ജീവനക്കാരാണ് എറണാകുളം ജനറല് ആശുപത്രിയില് എത്തിച്ചത്. തുടര്ന്ന് കൊച്ചി മെഡിക്കല് ട്രസ്റ്റ് ആശുപത്രിയില് വിദഗ്ധ ചികില്സ തേടി. ഇ.എന്.ടി വിഭാഗം നടത്തിയ പരിശോധനയില് കര്ണപുടത്തിന് പരിക്കുണ്ടെന്ന് കണ്ടെത്തിയതായി പരാതിയില് പറയുന്നു. മര്ദ്ദിച്ച മേലുദ്യോഗസ്ഥന് സര്വീസ് സംഘടനയില് സ്വാധീനമുള്ളതിനാല് കള്ളക്കേസില് കുടുക്കി ജോലി കളയുമെന്ന ഭീഷണി തുടരുകയാണ്. തനിക്ക് എ.ജിയുടെ ഓഫിസില് ജോലി ചെയ്യാന് ജീവന് ഭീഷണിയുണ്ടെന്ന് ചൂണ്ടിക്കാട്ടി പരാതി നല്കിയെങ്കിലും പോലീസ് ഇതുവരെ നന്ദനുവിന്റെ മൊഴിയെടുത്തിട്ടില്ല. അഡ്വക്കറ്റ് ജനറലിന്റെ ഓഫിസിലെ സ്വാധീനം ഉപയോഗിച്ച് കേസ് അട്ടിമറിക്കുമോയെന്ന ആശങ്ക പരാതിക്കാരനുണ്ട്. അതിനാല് പട്ടികജാതി ഗോത്ര കമ്മീഷനും പരാതി നല്കുമെന്ന് നന്ദനു പറഞ്ഞു.
