റാന്നി: സാമൂഹ്യക്ഷേമ പെൻഷനുകൾ ഗുണഭോക്താക്കളുടെ വീടുകളിൽ നേരിട്ടെത്തിച്ചു നൽകുന്ന മാതൃകയിൽ കർഷക തൊഴിലാളി പെൻഷനും ഗുണഭോക്താക്കളുടെ കൈകളിൽ നേരിട്ടെത്തിക്കാൻ ആവശ്യമായ നിയമഭേദഗതി സർക്കാർ വരുത്തണമെന്ന് ബി.കെ.എം.യു ജില്ലാ സെക്രട്ടറി അഡ്വ. കെ.ജി രതീഷ് കുമാര് ആവശ്യപ്പെട്ടു. ബി.കെ.എം.യു റാന്നി മണ്ഡലം സമ്മേളനം ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം.കർഷക തൊഴിലാളികളിൽ ഭൂരിഭാഗവും വാർദ്ധക്യസഹജമായ അസുഖങ്ങളാൽ ബുദ്ധിമുട്ടുന്നവരും ബാങ്കുകളിലോ മറ്റ് സാമ്പത്തിക സ്ഥാപനങ്ങളിലോ നേരിട്ടെത്തി പെൻഷൻ തുക കൈപ്പറ്റാൻ പ്രായോഗിക ബുദ്ധിമുട്ടുകൾ നേരിടുന്നവരുമാണ്.
ഈ സാഹചര്യത്തിൽ നിലവിലുള്ള നിയമങ്ങളിൽ കാലോചിതമായ മാറ്റം വരുത്തി പെൻഷൻ വിതരണം കൂടുതൽ ലളിതമാക്കണമെന്നും അദേഹം ആവശ്യപ്പെട്ടു. ടി.പി. അനിൽകുമാർ അധ്യക്ഷത വഹിച്ചു. സി.പി.ഐ സംസ്ഥാന എക്സിക്യൂട്ടീവംഗം ലിസി ദിവാൻ, മണ്ഡലം സെക്രട്ടറി ജോജോ കോവൂർ, സന്തോഷ് കെ ചാണ്ടി, ഡി ശ്രീകല, വി.കെ. വാസുദേവൻ, ജോർജ് മാത്യു,സി.സുരേഷ്, പി.സി സജി, സി.ടി കുര്യാക്കോസ് എന്നിവർ പ്രസംഗിച്ചു. പുതിയ ഭാരവാഹികളായി പി.എസ് സതീഷ് കുമാർ (പ്രസിഡന്റ്), റ്റി.റ്റി ജോയി (വൈസ് പ്രസിഡന്റ്), ജോയി വള്ളിക്കാല (സെകട്ടറി), കെ.കെ വിലാസിനി (ജോയിന്റ് സെകട്ടറി), റ്റി. പി അനിൽകുമാർ (ട്രഷറർ) എന്നിവരെ തെരഞ്ഞെടുത്തു.
