ന്യൂഡല്ഹി: അഹമ്മദാബാദ് വിമാനാപകടത്തില് തെളിവുകള് സമഗ്രമായി വിലയിരുത്തണമെന്ന് പൈലറ്റുമാരുടെ സംഘടനയായ എഫ്ഐപി. ബോയിങ് 787 വിമാനങ്ങളുടെ ഇലക്ട്രിക്കല് സംവിധാനങ്ങളിലെ തെളിവുകള് വിശദമായി പരിശോധിക്കണമെന്നാണ് എഫ്ഐപി ആവശ്യപ്പെട്ടിരിക്കുന്നത്. അപകടത്തെക്കുറിച്ച് അന്വേഷിക്കുന്ന എയര്ക്രാഫ്റ്റ് ആക്സിഡന്റ് ഇന്വെസ്റ്റിഗേഷന് ബ്യൂറോയോടാണ് ഇക്കാര്യം ആവശ്യപ്പെട്ടത്. B787 വിമാനങ്ങളുടെ രൂപകല്പ്പനയില് ഇലക്ട്രിക്കല് സംവിധാനങ്ങള്ക്കുള്ള പങ്ക് കണക്കിലെടുക്കണം. എല്ലാ ഇലക്ട്രിക്കല്, ഇലക്ട്രോണിക് നിയന്ത്രിത സംവിധാനങ്ങളുടെയും വിശദവും സമഗ്രവുമായ പരിശോധന നടത്തണമെന്നും സംഘടന ആവശ്യപ്പെട്ടു. കഴിഞ്ഞ വര്ഷം ഗുജറാത്തിലെ അഹമ്മദാബാദില് ഉണ്ടായ വിമാനാപകടത്തില് 260 പേരാണ് കൊല്ലപ്പെട്ടത്.
ബോയിങ് 787 ഡ്രീംലൈനര് വിമാനമായ എഐ 171, 2025 ജൂണ് 12ന് അഹമ്മദാബാദ് വിമാനത്താവളത്തില് നിന്ന് പറന്നുയര്ന്ന ഉടന് തകര്ന്നു വീഴുകയായിരുന്നു. വിമാനത്തിലുണ്ടായിരുന്ന 242 പേരില് 241 പേരും, വിമാനം ഒരു മെഡിക്കല് വിദ്യാര്ഥി ഹോസ്റ്റലിലേക്ക് പതിച്ചതിനെ തുടര്ന്ന് അവിടെയുണ്ടായിരുന്ന 19 പേരുമാണ് മരിച്ചത്.
