തൃശ്ശൂര്: എ.ഐ. കാമറ ഇടപാടില് മുഖ്യമന്ത്രിക്കെതിരെ ഗുരുതര ആരോപണവുമായി ബി.ജെ.പി സംസ്ഥാന വൈസ് പ്രസിഡന്റ് ശോഭ സുരേന്ദ്രന്. എ.ഐ. കാമറ ഇടപാടില് ടെന്ഡര് ഏറ്റെടുത്തയാള് മുഖ്യമന്ത്രി പിണറായി വിജയന്റെ മകന്റെ ഭാര്യാ പിതാവിന്റെ ബിനാമിയാണെന്ന് ശോഭ സുരേന്ദ്രന് ആരോപിക്കുന്നു. ബിസിനസുകാരനായ പ്രകാശ് ബാബുവിന്റെ ബിനാമിയാണ് കാമറ ടെന്ഡര് ഏറ്റെടുത്ത പ്രസാദിയോ കമ്പനിയുടെ ഡയറക്ടര് രാംജിത്. ബിനാമിയാണെന്ന് തെളിയിക്കാനുള്ള രേഖകള് കേന്ദ്ര ഏജന്സികള്ക്ക് നല്കുമെന്നും ശോഭാ സുരേന്ദ്രന് വ്യക്തമാക്കി.
കാമറ ഇടപാടില് മുഖ്യമന്ത്രിയുടെ മകന്റെ ഭാര്യാപിതാവിനുള്ള ബന്ധം പ്രതിപക്ഷ നേതാക്കള് ഇതുവരെ പറയുന്നില്ല. മുഖ്യമന്ത്രിയെ സഹായിക്കാന് വേണ്ടിയാണ് പ്രതിപക്ഷ നേതാക്കള് മൗനം പാലിക്കുന്നത്. ബി.ജെ.പി അധ്യക്ഷനും പേര് പറയാത്തത് എന്താണെന്ന ചോദ്യത്തോട് അക്കാര്യം സംസ്ഥാന അധ്യക്ഷനോട് ചോദിക്കണമെന്ന് ശോഭാ സുരേന്ദ്രന് പറഞ്ഞു. പരസ്പര സഹായ മുന്നണിയുടെ ലീഡര് ആണ് വി ഡി സതീശനെന്നും അവര് കുറ്റപ്പെടുത്തി.
