നിർമിത ബുദ്ധി (ആർട്ടിഫിഷ്യൽ ഇന്റലിജൻസ്) സാങ്കേതിക വിദ്യ ഏറ്റവും വലിയ കുതിച്ചുചാട്ടം നടത്തുക ആരോഗ്യമേഖലയിലായിരിക്കുമെന്ന് നേരത്തെ വിലയിരുത്തപ്പെട്ടു. അതിനെ സാധൂകരിക്കുംവിധമുള്ളൊരു വാർത്തയാണിപ്പോൾ അമേരിക്കയിൽനിന്ന് വന്നിരിക്കുന്നത്. പെൻസിൽവേനിയ സർവകലാശാലയിലെ ഗവേഷകർ അർബുദ ചികിത്സാ രംഗത്ത് വൻ പ്രതീക്ഷയേകുന്നൊരു എ.ഐ ഉപകരണം വികസിപ്പിച്ചിരിക്കുന്നു -ഐ സ്റ്റാർ (ഇൻഫെറിങ് സൂപ്പർ റെസല്യൂഷൻ ടിഷ്യൂ ആർകിടെക്ചർ).
ഡോക്ടർമാർക്ക് രോഗനിർണയത്തിന് സഹായകമാകുംവിധം മെഡിക്കൽ ഇമേജുകൾ കൃത്യവും വിശദവുമായി വിലയിരുത്താൻ കഴിയുന്ന ഉപകരണമാണിത്. ഇതുവഴി രോഗനിർണയം എളുപ്പവും കൃത്യവുമാകും. ഈ ഉപകരണത്തിൽ നിലവിലുള്ള സാങ്കേതികവിദ്യയിൽനിന്ന് വ്യത്യസ്തമായി അർബുദ കോശങ്ങൾ നേരിട്ട് കാണാനാകും. ഇമ്യൂണോതെറപ്പി പോലുള്ള ചികിത്സകൾ ഏത് രോഗികളിലാണ് ഏറ്റവും കൂടുതൽ ഫലപ്രദമാവുക എന്നും ഈ ഉപകരണത്തിന് കണ്ടെത്താനാകും. മനുഷ്യശരീരത്തിലെ വിവിധ അർബുദ കോശങ്ങളിൽ ഐ സ്റ്റാറിന്റെ പ്രവർത്തനം പരീക്ഷിച്ചു വിജയിച്ചുവെന്ന് ‘നേച്ചർ ബയോടെക്നോളജി’യിൽ പ്രസിദ്ധീകരിച്ച പ്രബന്ധം വ്യക്തമാക്കുന്നു.
