ന്യൂഡല്ഹി : യുക്രെയ്നില് കുടുങ്ങിയ ഇന്ത്യക്കാരെ മടക്കിക്കൊണ്ടുവരാനുള്ള ഓപ്പറേഷന് ഗംഗ ദൗത്യത്തിലേക്ക് വ്യോമസേനയും. വ്യോമസേനയുടെ ചരക്ക് വിമാനങ്ങളാണ് യുക്രെയിന്റെ അതിര്ത്തി രാജ്യങ്ങളിലേക്ക് അയയ്ക്കുന്നത്. പ്രധാനമന്ത്രി നരേന്ദ്ര മോദിയാണ് ഇതിന് നിര്ദേശം നല്കിയത്. ഇന്ന് തന്നെ വ്യോമസേനയുടെ വിമാനം ഡല്ഹിയില് നിന്നും പുറപ്പെടുമെന്നാണ് സൂചന. വരുംദിവസങ്ങളില് കൂടുതല് വിമാനങ്ങള് രക്ഷാദൗത്യത്തില് പങ്കെടുക്കും.
രക്ഷാദൗത്യത്തിനായി സ്വകാര്യ വിമാനങ്ങളെയാണ് കേന്ദ്രസര്ക്കാര് ആശ്രയിച്ചിരുന്നത്. എന്നാല് അതിര്ത്തികളിലേക്ക് കൂടുതല് ഇന്ത്യക്കാര് എത്തിക്കൊണ്ടിരിക്കുന്ന സാഹചര്യത്തില് സ്വകാര്യവിമാനങ്ങള് മാത്രം ഉപയോഗിച്ചുള്ള ഒഴിപ്പിക്കല് ഫലം കാണില്ലെന്ന നിരീക്ഷണത്തെ തുടര്ന്നാണ് ഓപ്പറേഷന് ഗംഗാ ദൗത്യത്തില് വ്യോമസേനയെയും പങ്കെടുപ്പിക്കുന്നത്. ഇന്ത്യക്കാരെ മടക്കിക്കൊണ്ടുവരാന് ഇന്ന് സ്ലൊവാക്യയിലേക്ക് സ്പൈസ് ജെറ്റ് പ്രത്യേക സര്വീസ് നടത്തുന്നുണ്ട്. കോസിസിലേക്കാണ് വിമാനം പോകുന്നത്. ഒഴിപ്പിക്കലിന് മേല്നോട്ടം വഹിക്കാന് കേന്ദ്ര നിയമമന്ത്രി കിരണ് റിജിജു കോസിസിലേക്ക് പോകുന്നുണ്ട്.
