തിരുവനന്തപുരം: തിരുവനന്തപുരം അന്താരാഷ്ട്ര വിമാനത്താവളത്തില്‍നിന്ന് ബഹ്റൈന്, ദമാം എന്നിവിടങ്ങളിലേക്ക് പുതിയ സര്‍വീസുകള്‍ പ്രഖ്യാപിച്ച് എയര്‍ ഇന്ത്യ എക്‌സ്പ്രസ്. തിരുവനന്തപുരം-ബഹ്റൈന് സര്‍വീസ് ഈ മാസം 30നും തിരുവനന്തപുരം-ദമാം സര്‍വീസ് ഡിസംബര്‍ ഒന്നിനും ആരംഭിക്കും. 180 പേര്‍ക്കു യാത്ര ചെയ്യാവുന്ന ബോയിങ് 737- 800 വിമാനങ്ങളാണ് സര്‍വീസിന് ഒരുങ്ങുന്നത്. രണ്ട് സര്‍വീസുകള്‍ക്കും ബുക്കിങ് ആരംഭിച്ചു.
ബുധന്‍, ഞായര്‍ ദിവസങ്ങളിലാണ് തിരുവനന്തപുരം-ബഹ്റൈന് സര്‍വീസ്. ഈ ദിവസങ്ങളില്‍ വൈകിട്ട് 5.35ന് തിരുവനന്തപുരത്ത് നിന്ന് പുറപ്പെട്ട് 8.05ന് (പ്രാദേശിക സമയം) ബഹ്‌റൈനില്‍ എത്തിച്ചേരും. രാത്രി 9.05ന് (പ്രാദേശിക സമയം) ബഹ്‌റൈനില്‍ നിന്ന് തിരിച്ച് പറക്കുന്ന വിമാനം പുലര്‍ച്ചെ 4.25ന് തിരുവനന്തപുരത്തെത്തും. ഇതോടെ തിരുവനന്തപുരം-ബഹ്റൈന് സെക്ടറില്‍ സര്‍വീസ് നടത്തുന്ന രണ്ടാമത്തെ എയര്‍ലൈനെന്ന നേട്ടം എയര്‍ ഇന്ത്യ എക്‌സ്പ്രസ് സ്വന്തമാക്കി. ഗള്‍ഫ് എയര്‍ ഈ റൂട്ടില്‍ നേരത്തെ മുതല്‍ സര്‍വീസ് നടത്തുന്നുണ്ട്.
ചൊവ്വ, വ്യാഴം, ശനി ദിവസങ്ങളിലാണ് തിരുവനന്തപുരം-ദമാം സര്‍വീസ്. ഈ ദിവസങ്ങളില്‍ വൈകിട്ട് 5.35ന് പുറപ്പെടുന്ന വിമാനം രാത്രി 8.25ന് (പ്രാദേശിക സമയം) ദമാമിലെത്തും. തിരിച്ച് രാത്രി 9.25ന് (പ്രാദേശിക സമയം) പുറപ്പെട്ട് പുലര്‍ച്ചെ 5.05ന് തിരുവനന്തപുരത്ത് എത്തിച്ചേരും. തിരുവനന്തപുരം-ദമാം സെക്ടറില്‍ ഇത് ആദ്യ സര്‍വീസാണ്.
