മസ്കറ്റ് : മസ്കറ്റില്‍ നിന്ന് ഇന്ത്യയിലേക്കുള്ള വിമാന സര്‍വീസുകള്‍ ഒമാന്‍ എയര്‍ വര്‍ദ്ധിപ്പിച്ചു. മസ്കറ്റില്‍ നിന്ന് കൊച്ചി, ഡല്‍ഹി, ചെന്നൈ എന്നിവിടങ്ങളിലേക്ക് പ്രതിവാരം 10 വിമാനങ്ങള്‍ സര്‍വീസ് നടത്തുമെന്ന് അധികൃതര്‍ അറിയിച്ചു.
ഓഗസ്റ്റ് ഒന്നിനും ഒക്ടോബര്‍ 29നും ഇടയില്‍ ഈ സേവനങ്ങള്‍ ലഭ്യമാകും. അന്താരാഷ്ട്ര വിപണികളില്‍ മികച്ച സേവനം നല്‍കുന്നതിനും അവധി ദിവസങ്ങളില്‍ യാത്രക്കാരുടെ ആവശ്യങ്ങള്‍ നിറവേറ്റുന്നതിനുമുള്ള ഞങ്ങളുടെ സമഗ്രമായ പദ്ധതികളുടെ ഭാഗമായി കൂടുതല്‍ സേവനങ്ങള്‍ വിപുലീകരിക്കുകയാണെന്ന് ഒമാന്‍ എയര്‍ ഇന്ത്യന്‍ സബ്‌കോണ്ടിനന്റ്, ഏഷ്യ -പസഫിക് സെയില്‍സ് വൈസ് പ്രസിഡന്റ് ഹമദ് ബിന്‍ മുഹമ്മദ് അല്‍ ഹര്‍ത്തി പറഞ്ഞു.
മസ്കറ്റില്‍ നിന്ന് എട്ട് ഇന്ത്യന്‍ നഗരങ്ങളിലേക്ക് ആഴ്ചയില്‍ 122 വിമാനങ്ങള്‍ സര്‍വീസ് നടത്തും. ആഴ്ചയില്‍ 18 അധിക സര്‍വീസുകളും ഉണ്ടാകും. ഡല്‍ഹി, കൊച്ചി, ചെന്നൈ എന്നിവിടങ്ങളിലേക്ക് ആഴ്ചയില്‍ 10 വിമാനങ്ങളും ബെംഗളൂരു, മുംബൈ, കോഴിക്കോട്, ഹൈദരാബാദ് എന്നിവിടങ്ങളിലേക്ക് ആഴ്ചയില്‍ ഏഴ് വിമാനങ്ങളും ഗോവയിലേക്ക് ആഴ്ചയില്‍ മൂന്ന് വിമാനങ്ങളും സര്‍വീസ് നടത്തും.
