തിരുവനന്തപുരം : വന്യജീവി ആക്രമണം നേരിടാന് സമഗ്രമായ പദ്ധതി തയാറാക്കുമെന്ന് വനംമന്ത്രി എ.കെ. ശശീന്ദ്രന്. വനത്തിനുള്ളില് തടയണകള് നിര്മിച്ചും, ഫലവൃക്ഷങ്ങള് നട്ടും വന്യജീവികള്ക്ക് വെള്ളവും ഭക്ഷണവും ഉറപ്പുവരുത്തുമെന്നും എ.കെ ശശീന്ദ്രന് നിയമസഭാസമ്മേളനത്തില് പറഞ്ഞു. അക്കേഷ്യ പോലുള്ള മരങ്ങള് കാട്ടില്നിന്ന് വെട്ടിമാറ്റി ജലചൂഷണം തടയും. സൗരോര്ജ്ജ വേലികള് അറ്റകുറ്റപ്പണിക്കായി പുതിയ പദ്ധതി തയാറാക്കും. പാലക്കാട്, വയനാട് ജില്ലകളില് പ്രത്യേക ശ്രദ്ധ നല്കുമെന്നും മന്ത്രി സഭയെ അറിയിച്ചു.
അതേസമയം, നിയമസഭയില് ചോദ്യങ്ങള് യോജിപ്പിക്കുന്നതിനെക്കുറിച്ച് ഭരണ പ്രതിപക്ഷങ്ങള് തമ്മില് തര്ക്കമുണ്ടായി. പ്രതിപക്ഷത്തിന്റെ അവസരം നഷ്ടപ്പെടുന്നുവെന്ന് വി.ഡി സതീശന് ആരോപിച്ചു. കൂടിയാലോചിച്ച് തീരുമാനിക്കാമെന്ന് സ്പീക്കര് അറിയിച്ചു.
