തിരുവനന്തപുരം: എ.കെ.ജി സെന്ററിന് കല്ലെറിയുമെന്ന് ഫേസ്ബുക്കില് പോസ്റ്റിട്ട അന്തിയൂര്കോണം സ്വദേശി റിജുവിനെ (32) പോലീസ് ജാമ്യം നല്കി വിട്ടയച്ചു. സമൂഹമാധ്യമങ്ങളിലൂടെ കലാപത്തിന് ആഹ്വാനം ചെയ്തുവെന്നതടക്കം ജാമ്യമില്ലാ വകുപ്പുകള് ചുമത്തി ശനിയാഴ്ച രാത്രി ഇയാളെ കന്റോണ്മെന്റ് പോലീസ് അറസ്റ്റ് ചെയ്തെങ്കിലും തുടരന്വേഷണത്തില് വകുപ്പ് നിലനില്ക്കില്ലെന്ന് കണ്ടതോടെയാണ് സ്റ്റേഷന് ജാമ്യത്തില് വിട്ടയച്ചത്. രാഹുല് ഗാന്ധിയുടെ ഓഫിസ് ആക്രമണവുമായി ബന്ധപ്പെട്ട് കഴിഞ്ഞ 25നാണ് റിജു ഫേസ്ബുക്കില് കുറിപ്പിട്ടത്.
ഓഫിസ് ആക്രമിച്ചതിന് തിരിച്ചടിയായി എ.കെ.ജി സെന്ററിന്റെ ഒരു ജനല് ഗ്ലാസെങ്കിലും എറിഞ്ഞുപൊട്ടിക്കുമെന്നായിരുന്നു ഭീഷണി. ഇതിനു ശേഷമാണ് എ.കെ.ജി സെന്ററിന് നേരെ അജ്ഞാതന് സ്ഫോടകവസ്തുവെറിഞ്ഞത്. ശനിയാഴ്ച രാവിലെ ഇയാളെ കസ്റ്റഡിയിലെടുത്ത് പ്രത്യേക അന്വേഷണസംഘം ചോദ്യം ചെയ്തെങ്കിലും സ്ഫോടകവസ്തു എറിഞ്ഞ സംഭവത്തില് റിജുവിന് പങ്കുള്ളതായി കണ്ടെത്താനായില്ല. തുടര്ന്നാണ് ഇന്ത്യന് ശിക്ഷാനിയമത്തിലെ 153എ, കേരള പോലീസ് നിയമത്തിലെ 120(ഒ) തുടങ്ങിയ വകുപ്പുകള് ചുമത്തി അറസ്റ്റ് രേഖപ്പെടുത്തിയത്. എന്നാല് ഐ.പി.സി 153 എ കേസ് നിലനില്ക്കില്ലെന്ന് നിയമോപദേശം ലഭിച്ചതോടെ കേരള പോലീസ് നിയമത്തിലെ 120(ഒ) മാത്രം ചുമത്തി റിജുവിനെ ഞായറാഴ്ച രാവിലെ വിട്ടയക്കുകയായിരുന്നു.