ആലപ്പുഴ : ചാരുംമൂട് ചത്തിയറയില് പുതുച്ചിറക്കുളത്തില് യുവതി മുങ്ങി മരിച്ചതിനു കാരണം ഭര്ത്താവിന്റെ പ്രവൃത്തികളിലുള്ള അപമാനം സഹിക്കവയ്യാതെയെന്ന് ബന്ധുക്കള്. പച്ചക്കാട് അമ്പാടിയില് പ്രദീപിന്റെ ഭാര്യ വിജയലക്ഷ്മിയെയാണ് കുളത്തില് മുങ്ങി മരിച്ച നിലയില് കണ്ടെത്തിയത്. ഇവരുടെ പാവുമ്പയിലെ കുടുംബവീട്ടില് നിന്ന് പുലര്ച്ചെ ക്ഷേത്രത്തിലേയ്ക്ക് എന്നു പറഞ്ഞ് ഇറങ്ങിയ ലക്ഷ്മിയെ ഏഴരയോടെ മരിച്ച നിലയില് കണ്ടെത്തുകയായിരുന്നു.
വിജയലക്ഷ്മിയെ കാണാതെ രാവിലെ ബന്ധുക്കള് അന്വേഷിച്ച് ക്ഷേത്രത്തിലെത്തിയെങ്കിലും മറ്റേതെങ്കിലും ക്ഷേത്രത്തില്പോയതായിരിക്കാം എന്ന കണക്കു കൂട്ടലിലില് മടങ്ങിയിരുന്നു. തുടര്ന്ന് ഇവരുടെ സ്കൂട്ടര് ചിറയ്ക്കു സമീപത്തു നിന്നു കണ്ടെത്തി. കുളത്തിന്റെ കടവില് ചെരുപ്പും ലഭിച്ചു. ഇതോടെ നടത്തിയ പരിശോധനയിലാണ് മരിച്ച നിലയില് കണ്ടെത്തിയത്. മരണം ആത്മഹത്യയാണെന്ന് പോലീസ് വ്യക്തമാക്കി
പ്രണയിച്ചായിരുന്നു ഇരുവരും വിവാഹം കഴിച്ചത്. ഭര്ത്താവ് ഒരു മോഷ്ടവാണെന്ന് യുവതി വളരെ വൈകിയാണ് അറിഞ്ഞത് . വിവാഹ ശേഷം മോഷണ കേസുകളില് ഇയാള് അറസ്റ്റിലായി. തുടര്ന്ന് ഭര്ത്താവിനെ സ്ഥലത്തു നിന്നു മാറ്റിയാല് ഇയാളുടെ സ്വഭാവത്തിന് മാറ്റമുണ്ടാകും എന്നു കരുതിയാണ് ബെംഗളുരുവിലേയ്ക്കു കൊണ്ടു പോയത്. അവിടെയും മോശം സ്വഭാവം തുടര്ന്നതോടെ നാട്ടിലേയ്ക്കു തിരികെ പോരുകയായിരുന്നു. ഇവര്ക്ക് രണ്ടു കുട്ടികളുമുണ്ട്. ഒരു മാസം മുമ്പാണ് നാട്ടിലെത്തിയത്. ഇതിനിടെ വീണ്ടും മോഷണക്കേസില് ഭര്ത്താവ് ജയിലിലായതോടെ യുവതി കടുത്ത ദുഃഖത്തിലായിരുന്നു
മരണച്ചിറ എന്നറിയപ്പെടുന്ന ഈ കുളത്തില് നേരത്തെ നിരവധിപ്പേര് മുങ്ങിമരിച്ചിട്ടുണ്ടെന്നു നാട്ടുകാര് പറയുന്നു. ആഴത്തില് കുഴിച്ചിട്ടുള്ളതിനാല് ഇവിടെ ഏതുസമയത്തും വെള്ളമുണ്ട്. നൂറനാട് പോലീസാണ് സംഭവത്തില് കേസ് രജിസ്റ്റര് ചെയ്തിരിക്കുന്നത്. മരണത്തില് അസ്വാഭാവികത ഇല്ലെന്നാണ് പൊലീസ് നിഗമനം.
