ആലപ്പുഴ: ആലപ്പുഴയില് സ്റ്റേഷനില് നിര്ത്താന് മറന്നതിനെ തുടര്ന്ന് ട്രെയിന് പിന്നിലേക്കെടുത്ത് ലോക്കോ പൈലറ്റ്. ആലപ്പുഴയിലെ ചെറിയനാട് എന്ന സ്റ്റേഷനില് നിര്ത്താതെ പോയ വേണാട് എക്സ്പ്രസാണ് പിന്നിലേക്ക് എടുത്തത്. ഏതാണ്ട് 700 മീറ്ററോളം ദൂരം പിന്നിലേക്കോടി ട്രെയിന് സ്റ്റേഷനില് കാത്തുനിന്ന ആളുകളെ കയറ്റി യാത്ര തുടര്ന്നു.
ഇന്ന് രാവിലെ 7.45 ഓടെയായിരുന്നു സംഭവം. മാവേലിക്കര, ചെങ്ങന്നൂര് സ്റ്റേഷനുകള്ക്കിടയിലുള്ള ചെറിയ ഒരു സ്റ്റേഷനാണ് ചെറിയനാട്. സ്റ്റേഷനില് സിഗ്നല് ഇല്ലായിരുന്നു എന്നാണ് വിവരം. ഇതുകൊണ്ടാവാം ലോക്കോ പൈലറ്റിനു തെറ്റ് സംഭവിച്ചതെന്ന് അധികൃതര് പറയുന്നു. 8 മിനിറ്റോളം വൈകിയാണ് വേണാട് എക്സ്പ്രസ് സര്വീസ് നടത്തിയത്. വേണാട് ഉള്പ്പടെ ഇരുദിശകളിലുമായി ആകെ പത്തോളം ട്രെയിനുകള്ക്ക് മാത്രമാണ് ചെറിയനാട് സ്റ്റോപ്പ് ഉള്ളത്. എന്നും നിര്ത്താറുള്ള സ്റ്റേഷനില് ട്രെയിന് നിര്ത്താതെ പോയത് യാത്രക്കാര്ക്കിടയില് ആശയക്കുഴപ്പമുണ്ടാക്കി.
