കണ്ണൂർ : മദ്യക്കമ്പനികൾക്കു വില വർധിപ്പിച്ചു നൽകണമെന്ന ബവ്റിജസ് കോർപ്പറേഷന്റെ ശുപാർശ സർക്കാരിനും മദ്യക്കമ്പനികൾക്കും നേട്ടമാകുമെങ്കിലും മദ്യം ഉപയോഗിക്കുന്നവരുടെ പോക്കറ്റ് ചോർത്തും. കോവിഡ് കാലത്ത് ആകെയുലഞ്ഞ കുടുംബ ബജറ്റ് താളം തെറ്റുകയും ചെയ്യും.
ശതമാനം അടിസ്ഥാനപ്പെടുത്തിയാണു സർക്കാരിനു നികുതി ലഭിക്കുകയെന്നതിനാൽ കൂടുന്ന ഓരോ രൂപയും സർക്കാരിന് അധിക വരുമാനമാണ്. മദ്യക്കമ്പനികൾ നഷ്ടം സഹിക്കുന്നതിനാലാണു വില കൂട്ടാൻ ശുപാർശ നൽകിയതെന്ന ബെവ്കോയുടെ വാദം ന്യായമാണെങ്കിൽ വർധിക്കുന്ന വിലയുടെ നികുതിയെങ്കിലും ഒഴിവാക്കാനാണു സർക്കാർ തയാറാകേണ്ടത്. ബജറ്റിൽ വില വർധനയുണ്ടാകുമെന്ന സൂചനകൾ ശക്തമാണ്.
