തിരുവനന്തപുരം : കടക്കാവൂരില് അമ്മ മകനെ പീഡിപ്പിച്ചെന്ന കേസില് ദുരൂഹത. അമ്മയ്ക്കെതിരെ മൊഴി നല്കാന് അച്ഛന് സഹോദരനെ നിര്ബന്ധിച്ചിരുന്നതായി ഇളയകുട്ടി . ഭര്ത്താവിന്റെ രണ്ടാം വിവാഹത്തെ എതിര്ത്തതിന്റെ വൈരാഗ്യത്തില് കേസില് കുടുക്കിയതാണെന്ന് മാതാപിതാക്കളും പരാതിപ്പെടുന്നു .
ഭാര്യക്കെതിരെ പരാതിയുമായെത്തിയ ഭര്ത്താവ് നിയമപരമായി വിവാഹമോചനം നേടാതെയാണ് മറ്റൊരു വിവാഹം കഴിച്ചതെന്നും ആരോപണം. 17വും 14ഉം 11ഉം വയസുള്ള മൂന്ന് ആണ്കുട്ടികളും 6 വയസുള്ള പെണ്കുട്ടിയുമാണ് കുറ്റാരോപിതയായ യുവതിക്കുള്ളത്. പ്രണയവിവാഹമായിരുന്നെങ്കിലും നിരന്തര പീഡനമായതോടെ മൂന്ന് വര്ഷമായി ഭര്ത്താവുമായി വേര്പെട്ടാണ് താമസം.
ഇതോടെ ഭര്ത്താവ് മറ്റൊരു വിവാഹം കഴിച്ചു. അതിന് ശേഷം മൂന്ന് കുട്ടികളെ ഭര്ത്താവിനൊപ്പം കൊണ്ടുപോയി. ഇതിലൊരുകുട്ടിയുടെ മൊഴിയിലാണ് കേസും അറസ്റ്റും. എന്നാല് മകനെ കൊണ്ട് ഭര്ത്താവ് പറഞ്ഞ് പറയിപ്പിച്ചതാണെന്ന് യുവതിക്കൊപ്പമുള്ള കുട്ടിയുടെ വാക്കുകള് സൂചിപ്പിക്കുന്നു.
നിയമപരമായി വിവാഹമോചനം നേടാതെ രണ്ടാം വിവാഹം കഴിച്ചതിനെ എതിര്ത്തും ജീവനാംശം ആവശ്യപ്പെട്ടും യുവതി പരാതി നല്കിയിരുന്നു. ഇതിലെ വൈരാഗ്യമാണ് പരാതിക്ക് കാരണമെന്നും ആക്ഷേപമുണ്ട്. മകളുടെ നിരപരാധിത്വം തെളിയിക്കാനുള്ള നെട്ടോട്ടത്തിലാണ് പ്രായമായ ഈ മാതാപിതാക്കളും അവര്ക്കൊപ്പമുള്ള നാട്ടുകാരും.
