കീക്കൊഴൂര് : വയലത്തല കൃപഭാവനു സമീപം അന്ത്യാളംകാവ് റോഡിൽ പിഴുതു വീണ വൈദ്യുതി തൂണ് 4 ദിവസമായിട്ടും മാറ്റിയില്ലെന്ന് ആരോപണം. വൈദ്യുതി വകുപ്പ് റാന്നി സൗത്ത് സെക്ഷന് ഓഫീസില് വിവരം അറിയിച്ചിട്ടും നിസംഗത കാട്ടുന്നുവെന്നാണ് ആരോപണം. സമീപത്തെ സൊസൈറ്റി പടി ട്രാൻസ്ഫോർമർ ചാർജ് ചെയ്തിട്ടുണ്ടെന്നും 11 കെവിയിലെ മറ്റുപണികൾ കഴിഞ്ഞ് വന്ന് തൂണ് നിവർത്താമെന്നുമാണ് ഇപ്പോള് പറയുന്നത്. വീണ്ടും ബന്ധപ്പെട്ടവരെ അറിയിച്ചപ്പോള് പ്രകൃതി ദുരന്തമാണെന്നും ചീഫ് ഓഫീസില് പരാതി പരിഹാരം താമസിക്കുന്ന വിവരം അറിയിക്കാനുമാണ് മറുപടി.
എല്ലാ വീടുകളിലും കുഴല്കിണര് ആയതിനാൽ കുടിവെള്ളത്തിനും മറ്റും ജനങ്ങള് ബുദ്ധിമുട്ടുകയാണ്. അത്യാവശ്യഘട്ടത്തിൽ ആശുപത്രിയില് പോകുന്നതിനും മറ്റും വാഹനങ്ങൾ പോലും ഉപയോഗിക്കാന് പറ്റാത്ത അവസ്ഥയിലാണ് നാട്ടുകാര്. അടിയന്തിരമായി വൈദ്യുതി തൂണ് മാറ്റി വഴി സഞ്ചാരയോഗ്യമാക്കാന് നടപടി സ്വീകരിക്കണമെന്നാണ് നാട്ടുകാരുടെ ആവശ്യം.
