ദില്ലി: സ്ത്രീകള്ക്കെതിരെയുള്ള കുറ്റ കൃത്യങ്ങള് വര്ധിച്ചു വരുന്ന സാഹചര്യത്തില് പുതിയ മുന്നറിയിപ്പുമായി നാഷണല് ക്രൈം ഇന്വെസ്റ്റിഗേഷന് ബ്യൂറോ. കുട്ടികളെ ഉപയോഗിച്ച് നടത്തുന്ന പുതിയ തട്ടിപ്പിനെതിരെ ജാഗ്രത പുലര്ത്തണമെന്ന മുന്നറിയിപ്പാണ് നാഷണല് ക്രൈം ഇന്വെസ്റ്റിഗേഷന് ബ്യൂറോ നല്കുന്നത്. വഴി തെറ്റി റോഡരുകിലും മറ്റും ഒറ്റയ്ക്കിരുന്നു കരയുന്ന കുട്ടികള് മിക്ക ഇന്ത്യന് നിരത്തുകളിലും സാധാരണ കാഴ്ചയാണ്. ഇങ്ങനെ ഒറ്റയ്ക്കിരുന്ന് കരയുന്ന കുട്ടികളെ കണ്ടാല് അവരെ സഹായിക്കാന് സന്നദ്ധത കാണിക്കുന്നവരെ ലക്ഷ്യമിട്ട് കൊണ്ടുള്ളതാണ് പുതിയ തട്ടിപ്പ്.
വഴിയില് ഒറ്റയ്ക്കിരുന്ന് കരയുന്ന കുട്ടികളെ സഹായിക്കാന് അടുത്ത ചെല്ലുമ്പോള് കുട്ടി ഒരു മേല് വിലാസം കാണിക്കും. ആ വിലാസത്തില് കൊണ്ട് വിടാനായിരിക്കും കുട്ടി ആവശ്യപ്പെടുക. എന്നാല് ഇതിന്റെ പിന്നില് പ്രവര്ത്തിക്കുന്നത് വന് തട്ടിപ്പ് സംഘങ്ങളായിരിക്കും. സ്ത്രീകളാണ് പൊതുവെ ഇത്തരത്തില് കൂടുതലും തട്ടിപ്പിനിരയാകുന്നത്. സ്ത്രീകളെയും പെണ്കുട്ടികളെയും തട്ടിക്കൊണ്ടുപോയി ബലാത്സംഗം ചെയ്യുകയോ മോചന ദ്രവ്യം ആവശ്യപ്പെടുകയോ ചെയ്യുന്ന സംഘത്തിന്റെ കെണിയായിരിക്കും ഇതെന്നാണ് നാഷണല് ക്രൈം ഇന്വെസ്റ്റിഗേഷന് ബ്യൂറോ നല്കുന്ന മുന്നറിയിപ്പ്.
