പത്തനംതിട്ട : അന്താരാഷ്ട്ര നിലവാരത്തില് നിര്മ്മാണം പുരോഗമിക്കുന്ന പത്തനംതിട്ട ജില്ലാ സ്റ്റേഡിയത്തിനോടൊപ്പം സമീപത്തെ നടപ്പാതകളും മുഖം മിനുക്കുന്നു. നഗര സൗന്ദര്യവത്കരണത്തിന്റെ ഭാഗമായാണ് സ്റ്റേഡിയം ജങ്ക്ഷനില് റിംഗ് റോഡില് നടപ്പാത ഒരുങ്ങുന്നത്. ഇവിടെ ഇരിപ്പിടങ്ങളും ചെറിയ പാര്ക്കുകളും ക്രമീകരിക്കും. മുത്തൂറ്റ് ആശുപത്രി ജംഗ്ഷന് മുതല് സെന്റ് പീറ്റേഴ്സ് ജംഗ്ഷന് വരെയുള്ള ഭാഗത്തായാണ് ഇപ്പോള് പണികള് നടക്കുന്നത്. രണ്ട് കിലോമീറ്റര് ദൂരത്തില് ഇന്റര് ലോക്കുകളും ടൈലുകളും ആണ് പാകുന്നത്. തണല് മരങ്ങള്ക്ക് ചുറ്റും ഇരിപ്പിടവും റോഡില് ബഞ്ചുകളും സ്ഥാപിക്കും. 6.5 കോടി രൂപ ചിലവിലാണ് പദ്ധതി.
സ്റ്റേഡിയത്തിന്റെ വലത് ഭാഗത്ത് നടപ്പാതയും ഇടത് ഭാഗത്ത് ഇരിപ്പിടവുമാണ് ക്രമീകരിക്കുന്നത്. ഇത് പൂര്ത്തിയാകുന്നതോടെ പത്തനംതിട്ട നഗരത്തിലെ പ്രധാന ആകര്ഷണ കേന്ദ്രങ്ങളില് ഒന്നായി ഇവിടം മാറും. കാല് നടയാത്ര സൗഹൃദപരമാക്കാന് വേണ്ടിയാണ് നടപ്പാതകള് പ്രധാനമായും നവീകരിക്കുന്നത്. പൊതു മരാമത്ത് വകുപ്പിന്റെ നേതൃത്വത്തിലാണ് നിര്മ്മാണപ്രവര്ത്തനങ്ങള് പുരോഗമിക്കുന്നത്. ഈ ഭാഗത്ത് വഴിയോര കച്ചവടം അനുവദിക്കില്ല. പത്തനംതിട്ട നഗരത്തില് എത്തുന്നവര്ക്ക് വിശ്രമിക്കാനും സമയം ചിലവഴിക്കാനും ഈ സ്ഥലങ്ങള് പ്രയോജനപ്പെടും. നഗരത്തില് വിശ്രമ കേന്ദ്രങ്ങള് ഇല്ലെന്ന ഏറെനാളത്തെ ജനങ്ങളുടെ പരാതികള്ക്ക് പരിഹാരമാകുന്നതാണ് ഈ പദ്ധതി.
