പത്തനംതിട്ട : ഇന്ത്യാ ഗേറ്റിൽ അര നൂറ്റാണ്ടായി ജ്വലിച്ച അമർ ജവാൻ ജ്യോതി ദേശീയ യുദ്ധ സ്മാരകത്തിലെ ജ്യോതിയിൽ ലയിപ്പിച്ച കേന്ദ്ര സർക്കാർ നടപടി പ്രതിഷേധാർഹമെന്ന് യൂത്ത് കോൺഗ്രസ് സംസ്ഥാന നിർവാഹക സമിതി അംഗം നഹാസ് പത്തനംതിട്ട പറഞ്ഞു. 1971 ൽ പാകിസ്ഥാനുമായുളള യുദ്ധത്തിൽ വീരമൃത്യുവരിച്ച ഇന്ത്യൻ സൈനികരുടെ ഓർമ്മക്കായി അന്നത്തെ പ്രധാനമന്ത്രി ഇന്ദിരാ ഗാന്ധി നിർമിച്ച സ്മാരകത്തിലെ അണയാ ജ്യോതിയാണ് 2019 ൽ നിർമിച്ച ദേശീയ യുദ്ധ സ്മാരകത്തിലെ ജ്യോതിയിൽ ലയിപ്പിച്ചത്.
ഇത്തരം സമീപനങ്ങൾ ഭാരതത്തിന്റെ പൈതൃകവും ചരിത്രവും അട്ടിമറിക്കാനായി നരേന്ദ്ര മോഡി സർക്കാർ നടത്തുന്ന ശ്രമങ്ങളുടെ ഒടുവിലത്തെ ഉദാഹരണമാണെന്നും വരും ദിവസങ്ങളിൽ ശക്തമായ പ്രതിഷേധ പരിപാടികൾ സംഘടിപ്പിക്കുമെന്നും നഹാസ് വ്യക്തമാക്കി.
