ഹൈദരാബാദ്: പത്തുകോടി രൂപയുടെ തിമിംഗല ഛര്ദ്ദി പിടികൂടി ഉത്തര്പ്രദേശ് പോലീസ്. ലക്നൗവില് നിന്നും ഉത്തര്പ്രദേശ് പോലീസിന്റെ സ്പെഷ്യല് ടാസ്ക് ഫോഴ്സാണ് 4.12 കിലോയോളം വരുന്ന തിമിംഗല ഛര്ദ്ദി പിടിച്ചെടുത്തത്. കേസില് നാല് പേരെയാണ് പോലീസ് അറസ്റ്റ് ചെയ്തത്. 1972-ലെ വന്യജീവി സംരക്ഷണ നിയമപ്രകാരമാണ് പ്രതികളെ കസ്റ്റഡിയിലെടുത്തത്. സുഗന്ധ ദ്രവ്യ നിര്മ്മാണത്തിനാണ് ഇത് ഉപയോഗിക്കുന്നതെന്ന് പ്രതികള് വെളിപ്പെടുത്തി.
ലോകത്തിലെ തന്നെ ഏറ്റവും വിചിത്രമായ പ്രകൃതിദത്ത വസ്തുക്കളിലൊന്നാണ് തിമിംഗല ഛര്ദ്ദി. ഏറ്റവും വലിയ പല്ലുകളുള്ള സ്പെം വെയിലുകളാണ് ഇവ നിര്മ്മിക്കുന്നത്. നിരവധി സംഘങ്ങള് ഇത് കടത്തുന്നതായി റിപ്പോര്ട്ടുകള് വ്യക്തമാക്കുന്നു. ഈ വര്ഷം ജൂലൈയില് 28 കോടി രൂപ വിലമതിക്കുന്ന തിമിംഗല ഛര്ദ്ദി കേരളത്തില് കണ്ടെത്തിയിരുന്നു. ഒരു കിലോ തിമിംഗല ഛര്ദ്ദിയ്ക്ക് ഏകദേശം ഒരു കോടി രൂപയാണ് വില. പരമ്പരാഗത മരുന്നുകളിലും സുഗന്ധദ്രവ്യങ്ങളുടെ നിര്മ്മാണത്തിലും ഉപയോഗിക്കുന്നതിനാലാണ് ഇതിന് ഉയര്ന്ന വില.
