കാക്കനാട് : എറണാകുളം മുതല്‍ തിരുവനന്തപുരം വരെ സകല സിഗ്നലുകളും തെറ്റിച്ച് റോഡിലൂടെ ചീറിപ്പാഞ്ഞ ആംബുലന്‍സിന്റെ ഡ്രൈവറെ മോട്ടോര്‍ വാഹന വകുപ്പ് പിടികൂടി. അടിയന്തര ഘട്ടങ്ങളില്‍ നല്‍കിയിരിക്കുന്ന ഇളവ് മുതലെടുത്ത് റോഡ് നിയമങ്ങള്‍ പരസ്യമായി ലംഘിച്ചതിനാണ് നടപടി. അടൂര്‍ സ്വദേശിയായ ജോയ് എന്നയാള്‍ക്കാണ് അധികൃതര്‍ പിഴ ഈടാക്കിയത്.
എറണാകുളത്ത് കോവിഡ് ബാധിച്ച്‌ മരിച്ച രോഗിയുമായി തൂത്തുക്കുടിയിലേക്ക് പോയതാണ്. ശബ്ദംകേട്ട് ആളുകളും ട്രാഫിക് പോലീസും വഴിയൊരുക്കുകയും ചെയ്തിരുന്നു. സാധാരണ ഗതിയില്‍ അടിയന്തരമായി രോഗിയുടെ ജീവന്‍ രക്ഷിക്കേണ്ട സാഹചര്യങ്ങളില്‍ മാത്രമാണ് സൈറണും ലൈറ്റുകളും ഉപയോഗിക്കാനും അധികം വേഗതയില്‍ പോകാനും അനുവാദമുള്ളൂ.
ഈ അവസരത്തില്‍ റോഡില്‍ കൂടുതല്‍ പരിഗണന നല്‍കുന്ന ആംബുലന്‍സുകള്‍ക്ക് ചുവപ്പ് സിഗ്നല്‍ ലംഘിക്കാനും അപകടമുണ്ടാക്കാത്ത തരത്തില്‍ വണ്‍വേയിലൂടെ ഇരുദിശകളിലേക്കും പോകാനും അനുമതിയുണ്ട്. എന്നാല്‍, മൃതദേഹവുമായി പോകുന്ന ആംബുലന്‍സാണെങ്കില്‍ ഈ സൗകര്യങ്ങള്‍ ഉപയോഗിക്കരുതെന്നും സാധാരണ വാഹനങ്ങള്‍പോലെ ഓടിക്കണമെന്നുമാണ് നിയമം. അവശ്യ ഘട്ടങ്ങളില്ലാതെ ആംബുലന്‍സുകള്‍ ഫ്ലാഷ് ലൈറ്റുകള്‍ പ്രവര്‍ത്തിപ്പിച്ച്‌ സൈറണ്‍ മുഴക്കി ചീറിപ്പാഞ്ഞാല്‍ ശക്തമായ നടപടിയെടുക്കുമെന്ന് ആര്‍.ടി.ഒ പി.എം. ഷബീര്‍ വ്യക്തമാക്കി.
