കോന്നി : കോന്നിയില് അജ്ഞാത വാഹനമിടിച്ച് പൂവന്പാറ സ്വദേശി കൊല്ലപ്പെട്ടു. കൈതവന വീട്ടില് രാജുവാണ് മരിച്ചത്. സംസ്ഥാന പാതയില് കോന്നി പൂവന്പാറ പെട്രോള് പമ്പിന് എതിര്വശത്തായിരുന്നു മൃതദേഹം കണ്ടെത്തിയത്. കഴിഞ്ഞ രാത്രി 11 മണിയോടെയാണ് സംഭവം നടന്നതെന്ന് കരുതുന്നു. അപകടത്തില് മുഖം ഉള്പ്പെടെ വികൃതമായ അവസ്ഥയില് ആയിരുന്നു. കറുത്ത ടീ ഷര്ട്ടും പാന്റുമാണ് ധരിച്ചിരുന്നത്. വഴിയരികില് മൃതദേഹം കണ്ടതിനെ തുടര്ന്ന് നാട്ടുകാര് തെങ്ങുംകാവ് സ്വദേശി അനു കല്യാണിയെ വിവരം അറിയിക്കുകയും ഇദ്ദേഹം ആംബുലന്സുമായി സ്ഥലത്തെത്തി മൃതദേഹം കോന്നി മെഡിക്കല് കോളേജ് ആശുപത്രിയിലേക്ക് മാറ്റുകയുമായിരുന്നു.
കോന്നി പോലീസ് സംഭവസ്ഥലത്തെത്തി പരിശോധന നടത്തിയെങ്കിലും ഇടിച്ച വാഹനം ഏതാണെന്ന് തിരിച്ചറിയാന് കഴിഞ്ഞിട്ടില്ല. സ്ഥലത്ത് നിന്ന് ഇടിച്ച വാഹനത്തിന്റെത് എന്ന് കരുതുന്ന ഒരു ഭാഗവും ലഭിച്ചിട്ടുണ്ട്. സ്ഥലത്തെ സി.സി.റ്റി.വി ക്യാമറകള് പരിശോധിച്ച് അപകടത്തിന് കാരണമായ വാഹനം ഏതാണെന്ന് കണ്ടെത്താനുള്ള അന്വേഷണത്തിലാണ് കോന്നി പോലീസ്.
