മഞ്ചേരി : സംസ്ഥാനത്ത് സഹകരണ ബാങ്കുകളിലെ ക്രമക്കേടുകള് പുറത്തുവരുമ്പോള് വീണ്ടും ചര്ച്ചയായി ആനക്കയം സഹകരണ ബാങ്കിലെ ക്രമക്കേട്. 2018ല് ആറരക്കോടിയോളം രൂപയുടെ തിരിമറിയാണ് ഇവിടെ നടന്നത്. 232 നിക്ഷേപകരില്നിന്ന് പലപ്പോഴായി വാങ്ങിയ പണം അക്കൗണ്ടില് നിക്ഷേപിക്കാതെ പാസ്ബുക്കില് രേഖപ്പെടുത്തുകയും വ്യാജ രസീതി നല്കുകയും ചെയ്തായിരുന്നു തട്ടിപ്പ്. പലരും ജീവിതസമ്പാദ്യം മുഴുവന് ബാങ്കില് നിക്ഷേപിച്ചിരുന്നു. പിന്നീട് പണം പിന്വലിക്കാന് എത്തിയപ്പോഴാണ് സംഭവം പുറത്തറിയുന്നത്.
പെന്ഷന്കാര് മുതല് പ്രവാസികള് വരെ തട്ടിപ്പിനിരയായി. കല്യാണാവശ്യത്തിന് നിക്ഷേപിച്ച പണം നഷ്ടപ്പെട്ടവരും ഇക്കൂട്ടത്തിലുണ്ട്. പരാതിയെ തുടര്ന്ന് ബാങ്കിലെ യു.ഡി ക്ലര്ക്ക് കെ.വി. സന്തോഷ് കുമാറിനെ സസ്പെന്ഡ് ചെയ്യുകയും പിന്നീട് പിരിച്ചുവിടുകയും ചെയ്തു. കേസിന്റെ ഭാഗമായി കഴിഞ്ഞ ദിവസം ഇയാളുടെ വീട്ടില് വിജിലന്സ് സംഘം പരിശോധന നടത്തിയിരുന്നു.
കേസുമായി ബന്ധപ്പെട്ട പല രേഖകളും വീട്ടില്നിന്ന് കണ്ടെടുത്തതായാണ് വിവരം. നിക്ഷേപകരുടെ പണം തിരിച്ചുനല്കാനുള്ള ശ്രമമാണ് ബാങ്ക് ഭരണസമിതി നടത്തുന്നത്. ഇതിനായി കോടതിയെ സമീപിച്ചിട്ടുണ്ട്. ഇതിന് പുറമെ സന്തോഷിന്റെ പേരിലുള്ള ഭൂമി ബാങ്ക് ഏറ്റെടുത്തിട്ടുണ്ട്. ഇത് വില്ക്കാന് സഹകരണ വകുപ്പിന്റെ അനുമതിക്ക് കാത്തിരിക്കുകയാണ്. ഇത് ലഭിക്കുന്ന മുറക്ക് പണം നല്കുമെന്നും ഭരണസമിതി പറയുന്നു.