പത്തനംതിട്ട : അടൂര് ആനന്ദപ്പള്ളി സ്വദേശി എ.ആര് ശിവരാജന് (72) പ്രായത്തെ തോല്പ്പിച്ചു കൊണ്ട് സാക്ഷരതാ മിഷന്റെ ഹയര് സെക്കന്ഡറി പഠനം പൂര്ത്തിയാക്കി പരീക്ഷ എഴുതുന്നു. ഈ മാസം 26 ന് ആരംഭിക്കുന്ന ഹയര് സെക്കന്ഡറി തുല്യതാ പരീക്ഷ എഴുതുന്ന ശിവരാജനാണ് ജില്ലയിലെ ഏറ്റവും പ്രായം കൂടിയ പഠിതാവ്.
സാക്ഷരതാ മിഷന്റെ തന്നെ തുല്യതാ കോഴ്സുകളിലൂടെ ഏഴാം തരവും പത്താം തരവും പാസായി കൊണ്ടാണ് ശിവരാജന് ഇപ്പോള് ഹയര് സെക്കന്ഡറിതലം വരെ എത്തിയത്. അടൂര് ബോയ്സ് ഹയര് സെക്കന്ഡറി സ്കുളിലെ സമ്പര്ക്ക പഠന കേന്ദ്രത്തില് ഓണ്ലൈന് ക്ലാസുകളിലും ഓഫ് ലൈന് ക്ലാസുകളിലും പഠനം പൂര്ത്തിയാക്കിയ ശിവരാജന് മക്കളും മരുമക്കളും ഉന്നത വിദ്യാഭ്യാസം നേടിയവരായതിനാല് അവരോടൊപ്പം യോഗ്യത നേടാനുള്ള ആഗ്രഹമാണ് പഠനത്തിനായി പ്രേരിപ്പിച്ചത്. പെയിന്റിംഗ് തൊഴിലാളിയായ ശിവരാജന് അടൂര് നഗരസഭയിലെ ആനന്ദപ്പള്ളി തുടര് വിദ്യാകേന്ദ്രം പ്രേരക് രാധാമണി ശിവരാജന്റെ ഭര്ത്താവാണ്. മക്കളായ രാജേഷും രാജിയും അച്ഛന് പിന്തുണയോടെ ഒപ്പമുണ്ട്.