വിശാഖപട്ടണം : കോവിഡിന്റെ ഏറ്റവും പുതിയ വകഭേദമായ ‘ഒമിക്രോണ് ‘ആദ്യമായി ആന്ധ്രയില് റിപ്പോര്ട്ട് ചെയ്തു.അയര്ലന്ഡില് നിന്നെത്തിയ 34 കാരനിലാണ് ഒമിക്രോണ് സ്ഥിരീകരിച്ചത് . ഇയാള്ക്ക് രോഗലക്ഷണങ്ങളില്ല. ശനിയാഴ്ച നടത്തിയ ആര്.ടി.പി.സി.ആര് പരിശോധന ഫലം നെഗറ്റീവായിരുന്നു.ഇതിനിടെ രാജ്യത്തെ ഒമിക്രോണ് കേസുകളുടെ എണ്ണം 34 ആയി വര്ധിച്ചു. ഡല്ഹിയില് ഇന്നലെ രണ്ടാമത്തെ കേസ് സ്ഥിരീകരിച്ചിരുന്നു. അതെ സമയം മഹാരാഷ്ട്ര, രാജസ്ഥാന്, കര്ണാടക എന്നിവയാണ് ഒമിക്രോണ് സ്ഥിരീകരിച്ച മറ്റു സംസ്ഥാനങ്ങള്.
രാജ്യത്ത് ഒമിക്രോണ് ബാധിതര് വര്ധിക്കുന്ന സാഹചര്യത്തില്, കോവിഡ് 19 സ്ഥിതിഗതികള് കര്ശനമായി നിരീക്ഷിക്കാന് സംസ്ഥാനങ്ങള്ക്ക് കേന്ദ്രം നിര്ദേശം നല്കി. പുതിയ കോവിഡ് പോസിറ്റീവ് കേസുകളുടെ ക്ലസ്റ്ററുകള് തടയുന്നതിന് ജില്ലതലത്തില് നടപടികള് കേന്ദ്രീകരിക്കണമെന്ന് ആവശ്യപ്പെട്ട് കേന്ദ്ര ആരോഗ്യ സെക്രട്ടറി രാജേഷ് ഭൂഷണ് സംസ്ഥാനങ്ങള്ക്ക് കത്തയക്കുകയും ചെയ്തു. കേരളം അടക്കം മൂന്നു സംസ്ഥാനങ്ങളിലെ എട്ടു ജില്ലകളില് പോസിറ്റിവിറ്റി നിരക്ക് കഴിഞ്ഞ രണ്ടാഴ്ചയായി 10 ശതമാനത്തിന് മുകളിലാണെന്ന് കേന്ദ്രസര്ക്കാര് അറിയിച്ചു. മിസോറാം, സിക്കിം എന്നിവയാണ് മറ്റുള്ള സംസ്ഥാനങ്ങള്.
