ഹൈദരാബാദ് : ആന്ധ്രാപ്രദേശിലെ കുര്‍നൂലില്‍ മിനിവാനും ട്രക്കും കൂട്ടിയിടിച്ച്‌ 14 പേര്‍ മരിച്ചു. നാല് പേര്‍ക്ക് ഗുരുതരമായി പരിക്കേറ്റു. ദേശീയപാത 44ല്‍ ഞായറാഴ്ച രാവിലെയായിരുന്നു അപകടം. കുര്‍നൂല്‍ ജില്ലയിലെ മദര്‍പുരം വില്ലേജിലാണ് അപകടമുണ്ടായത്.
ചിറ്റൂര്‍ ജില്ലയിലെ മദനപ്പള്ളിയില്‍ നിന്നും രാജസ്ഥാനിലെ അജ്മീറിലേക്ക് പോയ തീര്‍ഥാടക സംഘമാണ് അപകടത്തില്‍പ്പെട്ടതെന്ന് പോലീസ് പറഞ്ഞു. തീര്‍ഥാടകര്‍ സഞ്ചരിച്ച മിനിവാന്‍ നിയന്ത്രണം വിട്ട് എതിര്‍ദിശയില്‍ നിന്ന് വന്ന ട്രക്കില്‍ ഇടിക്കുകയായിരുന്നു. ഞായറാഴ്ച പുലര്‍ച്ചെ 3.30നായിരുന്നു അപകടം. എട്ട് സ്ത്രീകളും ഒരു കുഞ്ഞുമടക്കം അഞ്ച് പുരുഷന്‍മാരും സംഭവ സ്ഥലത്ത് വെച്ച്‌ മരിച്ചു.
പരിക്കേറ്റവരെ പോലീസും നാട്ടുകാരും ചേര്‍ന്ന് സമീപത്തെ സര്‍ക്കാര്‍ ആശുപത്രിയില്‍ പ്രവേശിപ്പിച്ചു. പരിക്കേറ്റവരുടെ നില ഗുരുതരമാണെന്ന് ഡോക്ടര്‍മാര്‍ അറിയിച്ചു. മിനിവാന്‍ ഡ്രൈവര്‍ ഉറങ്ങിപ്പോയതോ ടയര്‍ പൊട്ടിയതോ ആകാം അപകടകാരണമെന്നാണ് പോലീസിന്‍റെ നിഗമനം.
