തിരുവനന്തപുരം : നാടിനെ നടുക്കിയ കൊലപാതകത്തില് 80 ദിവസം കൊണ്ട് കുറ്റപത്രം സമര്പ്പിച്ച് പേട്ട പോലീസ്. വീട്ടിലെത്തിയ മകളുടെ ആണ് സുഹൃത്തിനെ കുത്തിക്കൊന്ന കേസിലാണ് പേട്ട പോലീസ് കുറ്റപത്രം സമര്പ്പിച്ചത്. തിരുവനന്തപുരം അഡീഷണല് ചീഫ് ജുഡീഷ്യല് മജിസ്ട്രേറ്റ് കോടതിയിലാണ് കുറ്റപത്രം സമര്പ്പിച്ചത്. 2021 ഡിസംബര് 29ന് പുലര്ച്ചെ മൂന്നരയോടെ ആനയറ പാലത്തിനു സമീപം ടി.സി 93/2226 ഐശ്വര്യയില് വാടകയ്ക്ക് താമസിക്കുന്ന അനീഷ് ജോര്ജാണ് (19) കുത്തേറ്റ് മരിച്ചത്. കുറ്റകൃത്യത്തിന് ശേഷം പേട്ട ചായക്കുടി ലെയിന് ഏദനില് സൈമണ് ലാലന് (51) പേട്ട പോലീസ് സ്റ്റേഷനില് കീഴടങ്ങുകയായിരുന്നു. മൊഴികളുടെ വൈരുദ്ധ്യത്തില് അന്വേഷണം വലയ്ക്കുന്ന നിലയില് പ്രതി എത്തിച്ചെങ്കിലും തെളിവുകളെല്ലാം കൃത്യമായി ശേഖരിച്ച് സാഹചര്യം അന്വേഷിച്ചുമാണ് കുറ്റപത്രം സമര്പ്പിച്ചത്. പ്രതിക്ക് ജാമ്യം ലഭിക്കരുതെന്ന ഉദ്ദേശ്യമായിരുന്നു പോലീസിന്റേത്.
ആദ്യം കള്ളനെന്നു പറഞ്ഞ് അനീഷിനെ കുത്തിയതായാണ് പോലീസിന് സൈമണ് മൊഴി നല്കിയതെങ്കിലും വിവിധ തരത്തിലുള്ള അന്വേഷണത്തില് കൊലപ്പടുത്താനുള്ള കാര്യം സൈമണ് ലാലന് പറയേണ്ടിവന്നു. മകളുടെ ആണ്സുഹൃത്തിനോട് തോന്നിയ വൈരാഗ്യമാണ് അനീഷ് വീട്ടിലെത്തിയപ്പോള് കരുതിക്കൂട്ടി കൃത്യം ചെയ്യാന് സൈമണ് ലാലനെ പ്രേരിപ്പച്ചെതെന്ന് പോലീസിനോട് ഒടുവില് സമ്മതിക്കേണ്ടിവന്നു. സാങ്കേതിക തെളിവുകള്, ഫോറന്സിക് തെളിവുകള് എന്നിവയും ഇതില് ഉപയോഗിക്കേണ്ടിവന്നു.
മുന് വൈരാഗ്യത്തിന്റെ പേരിലാണ് കൊലപാതകമെന്നാണ് കുറ്റപത്രത്തിലുള്ളത്. അനീഷിന്റെ ഫോണ് രേഖകള്, പോലീസ് നായ മണംപിടിച്ച് പോയ സ്ഥലം തുടങ്ങിയവ നിരീക്ഷണം നടത്തിയാണ് കൊല്ലപ്പെട്ട അനീഷ് വന്ന വഴി സ്ഥിരീകരിച്ചത്. പ്രവാസിയായിരുന്ന സൈമണ് ലാലന് ഒന്നരവര്ഷം മുന്പാണ് നാട്ടില് മടങ്ങിയെത്തിയത്. ഇപ്പോള് പൂജപ്പുര സെന്ട്രല് ജയിലിലാണ് പ്രതി. പേട്ട സി.ഐ റിയാസ് രാജ എം.ബി യുടെ നേതൃത്വത്തില് എസ്.ഐമാരായ രതീഷ്,സുധീഷ് എ.എസ്.ഐ എഡ്വിന്, ജയനാരായണന്, വനിത സി.പി.ഒ ശരണ്യ, സി.പി.ഒ മാരായ അരുണ്, വിപിന് എന്നിവരടങ്ങിയ സംഘമാണ് കേസ് അന്വേഷിച്ച് കുറ്റപത്രം സമര്പ്പിച്ചത്.
