ദില്ലി: അനില് ആന്റണി ബിജെപി ദേശീയ ആസ്ഥാനത്തെത്തി. ബിജെപിയില് അംഗത്വമെടുത്തേക്കുമെന്ന സൂചനകള്ക്ക് ഇടയിലാണ് ഇത്. കോണ്ഗ്രസ് അംഗത്വം രാജിവെച്ച ശേഷമാണ് അദ്ദേഹം ബിജെപി ആസ്ഥാനത്ത് എത്തിയത്. മൂന്ന് മണിക്ക് പ്രധാന നേതാവ് ബിജെപിയില് ചേരുമെന്ന് പാര്ട്ടി വക്താക്കള് അറിയിച്ചിരുന്നു. ഇത് അനില് ആന്റണിയാണെന്ന് നേരത്തെ അഭ്യൂഹങ്ങളുണ്ടായിരുന്നു. ബിജെപി ദേശീയ ആസ്ഥാനത്ത് കേന്ദ്രമന്ത്രി പിയൂഷ് ഗോയല് അനില് ആന്റണിക്ക് പാര്ട്ടിയില് അംഗത്വം നല്കി സ്വീകരിക്കും.
കെപിസിസി ഡിജിറ്റല് മീഡിയ കണ്വീനറായിരുന്നു അനില് ആന്റണി. ബിബിസി ഡോക്യുമെന്ററി വിവാദത്തെ തുടര്ന്നാണ് അനില് ആന്റണി കോണ്ഗ്രസ് നേതൃത്വവുമായി ഇടഞ്ഞത്. ബിബിസിയുടെ നടപടി ഇന്ത്യയുടെ പരമാധികാരത്തിന് മേലുള്ള കടന്നുകയറ്റമാണെന്നും മുന്വിധിയുടെ ചരിത്രമുള്ള ചാനലാണ് ബിബിസിയെന്നും, ഇറാക്ക് യുദ്ധത്തിന്റെ തലച്ചോറായിരുന്നു മുന് യു കെ വിദേശകാര്യസെക്രട്ടറി ജാക് സ്ട്രോയെന്നും അനില് ആന്റണി ട്വീറ്റ് ചെയ്തിരുന്നു. ബിബിസിയുടെ ഡോക്യുമെന്ററി വിവാദത്തില് പ്രധാനമന്ത്രിയെ പരസ്യമായി പിന്തുണച്ചതോടെ സ്ഥാനം രാജിവെക്കേണ്ടി വന്നു. തുടര്ന്നാണ് അദ്ദേഹം കോണ്ഗ്രസിന് എതിരായ പരസ്യ നിലപാടുകള് സ്വീകരിച്ച് തുടങ്ങിയത്.
