കോന്നി : പുനലൂര് – മൂവാറ്റുപുഴ സംസ്ഥാനപാതയില് വീണ്ടും അപകടം. വകയാര് കോട്ടയംമുക്ക് ജംഗ്ഷനില് പച്ചക്കറി കയറ്റി വന്ന മിനി ലോറി നിയന്ത്രണം വിട്ട് മറിഞ്ഞതിനെ തുടര്ന്ന് ഡ്രൈവര്ക്ക് നിസാര പരിക്കേറ്റു. പുലര്ച്ചെ അഞ്ചരയോടെയാണ് അപകടം നടന്നത്. മഴയില് വാഹനം ബ്രേക്ക് ചവിട്ടിയപ്പോള് ടയറുകള് തെന്നി മാറുകയും ലോറി സമീപത്തെ മിനി മാസ്റ്റ് ലൈറ്റില് ഇടിച്ച് മറിയുകയുമായിരുന്നു. അപകടത്തില് പരിക്കേറ്റ ഡ്രൈവറെ ആശുപത്രിയില് പ്രവേശിപ്പിച്ചു. ഒരാഴ്ചക്കിടയില് രണ്ടാം തവണയാണ് വകയാറില് വാഹനാപകടം ഉണ്ടാകുന്നത്. മൂന്ന് ദിവസങ്ങള്ക്ക് മുന്പാണ് വകയാറില് നിയന്ത്രണം വിട്ട കെ.എസ്.ആര്.റ്റി.സി ബസ് സമീപത്തെ ഇലക്ട്രിക് പോസ്റ്റില് ഇടിച്ച് കയറിയതിനെ തുടര്ന്ന് ബസില് ഉണ്ടായിരുന്ന മൂന്ന് വനിതാ യാത്രക്കാര്ക്ക് പരിക്കേറ്റത്.
മഴ ശക്തമായതോടെ സംസ്ഥാനപാതയില് വാഹനാപകടങ്ങള് വര്ധിക്കുകയാണ്. ശക്തമായ മഴയില് റോഡില് വാഹനങ്ങളുടെ ടയറുകള് തെന്നിമാറിയാണ് അപകടങ്ങള് നടക്കുന്നത്. കലഞ്ഞൂര്, കൂടല്, മുറിഞ്ഞകല് ഭാഗങ്ങളും ഇപ്പോള് സ്ഥിരം അപകടമേഖലയാണ്. കഴിഞ്ഞ ദിവസമാണ് കലഞ്ഞൂര് വലിയ പള്ളിക്ക് സമീപം രണ്ട് കാറുകള് കൂട്ടിയിടിച്ചത്. ഇതേ സ്ഥലത്ത് നടന്ന വാഹനാപകടത്തില് കുറച്ച് നാളുകള്ക്ക് മുന്പാണ് തമിഴ്നാട് സ്വദേശികളായ അച്ഛനും മകളും മരണപ്പെട്ടത്.
