ചിറ്റാര് : ചിറ്റാര് കാരിക്കയത്ത് കക്കാട്ടാറിന്റെ പരിസരങ്ങളില് സാമൂഹ്യ വിരുദ്ധ ശല്യം വര്ധിക്കുന്നു. ആറിന്റെ തീരങ്ങളില് താവളമാക്കുന്ന ഇവര് പ്ലാസ്റ്റിക് മാലിന്യങ്ങള് നദിയില് ഉപേക്ഷിക്കുകയും ബഹളമുണ്ടാക്കുകയും ചെയ്യുന്നത് പതിവാണെന്ന് പരിസരവാസികള് പറയുന്നു. ഈ പ്രദേശങ്ങളില് ശുദ്ധജല ക്ഷാമം രൂക്ഷമായതിനാല് നിരവധി ആളുകളാണ് കുളിക്കുവാനും വസ്ത്രങ്ങള് അലക്കുവാനുമായി കക്കാട്ടാറില് എത്തുന്നത്. എന്നാല് മദ്യപരുടെ ശല്യം മൂലം ഇവിടെ എത്തുന്ന സ്ത്രീകള് ഉള്പ്പെടെയുള്ളവര് തിരികെ പോകാറാണ് പതിവ്.
മദ്യപിച്ച ശേഷം നദിയിലേക്ക് കുപ്പികള് എറിഞ്ഞ് പൊട്ടിക്കുന്നതും ഇവരുടെ പതിവാണ്. ഇവിടെ സാമൂഹ്യ വിരുദ്ധ ശല്യം വര്ധിച്ചിട്ടും പോലീസും എക്സൈസും ഈ ഭാഗത്തേക്ക് തിരിഞ്ഞു നോക്കുന്നില്ലെന്നാണ് നാട്ടുകാരുടെ പരാതി. ഇവര് ഉപേക്ഷിക്കുന്ന പ്ലാസ്റ്റിക് മാലിന്യങ്ങള് വന്യ ജീവികള്ക്കും ഭീഷണിയാകുന്നു. ഇത്തരക്കാര്ക്ക് എതിരെ കര്ശന നടപടി സ്വീകരിക്കണമെന്നാണ് ആവശ്യമുയരുന്നത്.
