കോന്നി : ” താങ്കള് വിളിക്കുന്ന സബ്സ്ക്രൈബര് പരിധിക്ക് പുറത്താണ്” കോന്നി ഗ്രാമ പഞ്ചായത്തിലെ ആറാം വാര്ഡായ ആവോലിക്കുഴി പ്രദേശത്ത് താമസിക്കുന്ന ആരെ ഫോണില് വിളിച്ചാലും ഇതാണ് മറുപടി. കോന്നി വികസന പാതയില് മുന്നേറുമ്പോള് മൊബൈല് ഫോണുകള്ക്ക് റെയ്ഞ്ച് ലഭികാത്ത പ്രദേശവും കോന്നിയിലുണ്ട് എന്നതാണ് സത്യം. ബി.എസ്.എന്.എല് ഉള്പ്പെടെയുള്ള മൊബൈല് ഫോണുകള് ധാരാളമായി ഉണ്ടെങ്കിലും ഈ പ്രദേശത്ത് എത്തിക്കഴിഞ്ഞാല് ഫോണില് റെയ്ഞ്ച് ലഭിക്കില്ല. ചുരുക്കം ചില വീടുകളില് നിലനില്കുന്ന ലാന്ഡ് ഫോണുകള് മാത്രമാണ് ആശയവിനിമയം നടത്താന് ജനങ്ങള്ക്ക് ഇന്നും ആശ്രയം.
ഇരുനൂറിലധികം വീടുകളുള്ള കോന്നി ഗ്രാമപഞ്ചായത്തിലെ ഉയര്ന്ന പ്രദേശങ്ങളില് ഒന്നായ ഇവിടെ ഭൂരിഭാഗം വീടുകളിലും ലാന്ഡ് ഫോണുകള് ഉപയോഗിച്ചിരുന്നു. എന്നാല് കാലങ്ങള് കഴിഞ്ഞതോടെ ഇവയില് പലതും അപ്രത്യക്ഷമായി. പിന്നീട് വന്ന മൊബൈല് ഫോണുകളില് വിളിച്ചാല് ആരെയും കിട്ടാത്ത അവസ്ഥയുമാണ്. മൊബൈല് ടവര് കമ്പനികളുടെ ലയനമാണ് സിഗ്നല് ലഭിക്കാത്തതിന് പ്രധാന കാരണമെന്ന് പ്രദേശവാസികള് പറയുന്നു. മുന്പ് മലയാലപ്പുഴ, എലിമുള്ളുംപ്ലാക്കല് പ്രദേശങ്ങളിലെ ടവറുകളില് നിന്നായിരുന്നു സിഗ്നല് ലഭിച്ചിരുന്നത്, ഇപ്പോള് അതുമില്ല. ഇന്റര്നെറ്റ് സംവിധാനമില്ലാത്തതിനാല് വിദ്യാര്ഥികളും ബുദ്ധിമുട്ടിലാണ്. വനത്തോട് ചേര്ന്ന് കിടക്കുന്ന പ്രദേശമായതിനാല് രാത്രിയില് എന്തെങ്കിലും അത്യാഹിതം സംഭവിച്ചാല് പോലും പുറം ലോകത്തെ അറിയിക്കാന് ബുദ്ധിമുട്ടുകയാണ് ജനങ്ങള്.
