തിരുവനന്തപുരം: വൈദ്യുതി ബോര്ഡില് ഉയര്ന്ന തസ്തികകളില് കരാര് നിയമനത്തിന് ഉത്തരവ്. സ്ഥിരം ജോലിയുടെ സ്വഭാവമുള്ളയിടങ്ങളില് കരാര് നിയമനം പാടില്ലെന്ന സര്ക്കാര് നയത്തിന് വിരുദ്ധമായാണ് ഈ ഉത്തരവ് ഇറക്കിയിരിക്കുന്നത്.
പ്രോജക്ട് ഇന്വെസ്റ്റിഗേഷന്, സങ്കീര്ണമായ ജലവൈദ്യുതി ഉല്പാദനം, പ്രസരണം, സബ് സ്റ്റേഷന്, സുരക്ഷ- നിയന്ത്രണ പ്രവര്ത്തികള്, അടിയന്തര പരിപാലനം തുടങ്ങിയ മേഖലകളിലാണ് വിരമിച്ച ഉദ്യോഗസ്ഥരുടെ പട്ടിക തയ്യാറാക്കി കരാര് നിയമനം നല്കുന്നത്. കണ്സള്ട്ടന്റ് തസ്തികക്ക് അസിസ്റ്റന്റ് എഞ്ചിനീയര് മുതല് എക്സിക്യൂട്ടീവ് എഞ്ചിനീയര് വരെയുള്ള തസ്തികകളില് ജോലി ചെയ്തവരെയാണ് പരിഗണിക്കുക. വേതനം പ്രതിദിനം 3000 രൂപ. വൈദ്യുതി ബോര്ഡ് ചെയര്മാന്റെ നിര്ദ്ദേശങ്ങള്ക്ക് കഴിഞ്ഞ മാസം 27ന് ചേര്ന്ന ഫുള്ബോര്ഡ് യോഗമാണ് അംഗീകാരം നല്കിയത്. കുറഞ്ഞത് 30 ദിവസമെങ്കിലും നിയമനം നല്കണം. ഡയറക്ടര് ബോര്ഡിന്റെ അംഗീകാരം ഉണ്ടെങ്കില് രണ്ടുമാസം വരെ നീട്ടാം. 2026നകം ആയിരക്കണക്കിന് ഉദ്യോഗസ്ഥര് വിരമിക്കുന്നതിനാലാണ് ഇത്തരമൊരു സംവിധാനമെന്ന് ഉത്തരവില് പറയുന്നു.
