പത്തനംതിട്ട : നഗരത്തിലെ ഹോട്ടലുകളിലും മത്സ്യ വിപണന സ്റ്റാളുകളിലും വ്യാപക പരിശോധനയുമായി ഭക്ഷ്യസുരക്ഷാ വകുപ്പും പത്തനംതിട്ട നഗരസഭയും. പരിശോധനയില് ഹോട്ടലുകളില് നിന്ന് ഭക്ഷ്യയോഗ്യമല്ലാത്ത ഭക്ഷണപദാര്ത്ഥങ്ങളും മത്സ്യ വിപണന സ്റ്റാളുകളില് നിന്ന് അഴുകിയ നിലയിലുള്ള മത്സ്യവും കണ്ടെത്തി നശിപ്പിച്ചു. മത്സ്യ കച്ചവടക്കാരുടെ കൈവശം ഉണ്ടായിരുന്നത് ദിവസങ്ങളോളം പഴയ മത്സ്യം. മിക്കവയും അഴുകിയ നിലയിലായിരുന്നു. ഇത് എന്തുചെയ്യുമെന്ന് ചോദിച്ച പരിശോധനാ ഉദ്യോഗസ്ഥര്ക്ക് കൃത്യമായ മറുപടിയും മത്സ്യ വില്പ്പനക്കാരന് നല്കി. ഇവ ഹോട്ടലുകള്ക്ക് വില കുറച്ചു നല്കാനാണ്.
മത്സ്യം കേടുകൂടാതെ സൂക്ഷിക്കുവാന് ഉപയോഗിക്കുന്നത് അമോണിയ അമിത അളവില് ചേര്ത്ത ഐസാണ്. സാധാരണ ഐസ് മിനിട്ടുകള്ക്കകം അലിഞ്ഞ് വെള്ളമാകുമെങ്കില് അമോണിയാ ഐസ് മണിക്കൂറുകളോളം അലിയാതെ ഇരിക്കും. ഐസ് നിര്മ്മാണത്തിലാണ് അമോണിയ ഉപയോഗിക്കുന്നത്. എന്നാല് ഇത് സംബന്ധിച്ച് ഐസ് ഫാക്ടറികളില് പരിശോധന നടത്തുവാനോ മത്സ്യത്തിന്റെ കൂടെയുള്ള ഐസ് സാമ്പിളുകള് ശേഖരിച്ച് പരിശോധന നടത്തുവാനോ ഭക്ഷ്യ സുരക്ഷാ വകുപ്പ് തയ്യാറാകുന്നില്ല.
