ഇടുക്കി: അരിതേടി അരിക്കൊമ്പന്‍ തമിഴ്‌നാട്ടിലും ആക്രമണം തുടങ്ങി. ഇന്നലെ രാത്രിയോടെ മേഘമലക്ക് സമീപം മണലാര്‍ എസ്റ്റേറ്റിലെ റേഷന്‍ കടയുടെ ജനല്‍ തകര്‍ത്തെങ്കിലും അരി ഭക്ഷിക്കാതെ മടങ്ങിയെന്ന വിവരമാണ് തമിഴ്‌നാട് വനംവകുപ്പിന് ലഭിച്ചത്. ചിന്നക്കനാലിലേത് പോലെ രാത്രി രണ്ടു മണിക്ക് ശേഷമാണ് എസ്റ്റേറ്റിലെ റേഷന്‍ കടയുടെ ജനല്‍ കൊമ്പന്‍ ഭാഗികമായി തകര്‍ത്തത്. തകര ഷീറ്റുകൊണ്ട് മറച്ചിരുന്ന ജനലാണ് തകര്‍ക്കാന്‍ ശ്രമിച്ചത്. എന്നാല്‍ അരി തിന്നാതെ ആന തിരികെ കാടുകയറി. ഇതോടെ പ്രദേശവാസികള്‍ ആശങ്കയിലാണ്.
സമീപത്തെ ലയത്തിന്റെ ഒരു വാതിലും തുറക്കാന്‍ ശ്രമിച്ചു. പുലര്‍ച്ചെയോടെ പെരിയാര്‍ കടുവ സങ്കേതത്തിലെ വനമേഖലയിലെത്തി. അപ്പര്‍ മണലാര്‍ ഭാഗത്ത് സംസ്ഥാന വനംവകുപ്പിന്റെ കാമ്പിനുള്ളില്‍ കടന്നു. ആന കടന്ന് പോയപ്പോള്‍ കോമ്പൗണ്ടിനുള്ളിലുണ്ടായിരുന്ന താല്‍ക്കാലിക ഷെഡും ഭാഗികമായി തകര്‍ന്നു വീണു. തിരികെ അതിര്‍ത്തി മേഖലയിലെ വനത്തിനുള്ളിലേക്ക് കടന്നതായാണ് വനവകുപ്പിന് സിഗ്‌നല്‍ ലഭിച്ചിരിക്കുന്നത്.
