കായംകുളം : യു.ഡി.എഫ് സ്ഥാനാര്ഥിയുടെ തോല്വി സംബന്ധിച്ച് കെ.പി.സി.സി നിയോഗിച്ച കമ്മീഷന് പുനരന്വേഷണം തുടങ്ങി. നിയമസഭാ തെരഞ്ഞെടുപ്പില് യു.ഡി.എഫ് സ്ഥാനാര്ഥി അരിത ബാബു പരാജയപ്പെടാനുണ്ടായ കാരണങ്ങളുടെ പുനരന്വേഷണ ഭാഗമായ തെളിവെടുപ്പാണ് നടന്നത്. കെ.പി.സി.സി നിയോഗിച്ച അന്വേഷണ കമ്മീഷന് പി.ജെ. ജോയിയാണ് മേല്നോട്ടം വഹിച്ചത്.
നേതാക്കളില് നിന്നും പരാതികള് എഴുതി വാങ്ങിയതിനൊപ്പം അഭിപ്രായങ്ങളും ആരാഞ്ഞു. ഇതില് ഉചിതമായ റിപ്പോര്ട്ട് ഒരാഴ്ച്ചക്കുള്ളില് കെ.പി.സി.സി.ക്ക് നല്കുമെന്ന് ജോയി പറഞ്ഞു. മണ്ഡലം പ്രസിഡന്റുമാരുടെയും നേതാക്കളുടെയും അഭിപ്രായങ്ങളാണ് തേടിയത്. നേരത്തെ കെ.പി.സി.സി നിയോഗിച്ച മൂന്നംഗ കമ്മീഷന് തോല്ക്കാനുണ്ടായ കാരണങ്ങളെക്കുറിച്ച് അന്വേഷണം നടത്തിയിരുന്നു. ഇതില് ഉയര്ന്ന പരാതികളാണ് പുനരന്വേഷണത്തിന് കാരണമായത്. ജയിക്കാമായിരുന്ന മണ്ഡലമായിരുന്നെന്നും പ്രവര്ത്തനങ്ങളിലെ പോരായ്മകളാണ് പരാജയ കാരണമെന്നും വിലയിരുത്തലുണ്ടായിരുന്നു.
