കോന്നി : അരുവാപ്പുലം ഗ്രാമപഞ്ചായത്തിലെ സാമൂഹ്യ പെൻഷൻ ഗുണഭോക്താക്കളുടെ യോഗം പാര്ട്ടി പരിപാടിയാക്കി മാറ്റി. ഇന്ന് പകല് 2.30 ന് മുളന്തറ സെന്റ് മേരീസ് ഓര്ത്തഡോക്സ് പള്ളിയുടെ ഹാളിലാണ് മീറ്റിംഗ് നടക്കുക. 1, 2, 14,15 വാര്ഡുകളിലെ പെന്ഷന് ഗുണഭോക്താക്കളെയാണ് പഞ്ചായത്ത് പ്രസിഡന്റ് രേഷ്മ മറിയം റോയിയുടെ പേരില് സി.പി.എമ്മിന്റെ പോഷക സംഘടന ക്ഷണിച്ചിരിക്കുന്നത്. കെ.എസ്.കെ.റ്റി.യു മേഖലാ സെക്രട്ടറി മുരളിദാസ് കെ. ആണ് ഒപ്പിട്ട് കത്തയച്ചിരിക്കുന്നത്. കോന്നി എം.എല്.എ കെ.യു ജെനീഷ് കുമാര് ആണ് ഉദ്ഘാടകന്.
പഞ്ചായത്തിന്റെ ഈ നടപടിക്കെതിരെ യു.ഡി.എഫ് പ്രവര്ത്തകര് പ്രതിഷേധത്തിലാണ്. പഞ്ചായത്തിന്റെ ഔദ്യോഗിക പരിപാടിക്ക് സി.പി.എമ്മിന്റെ പോഷക സംഘടനയുടെ പേരില് കത്തയച്ചത് അംഗീകരിക്കില്ലെന്നും ഇതിനെതിരെ ശക്തമായ പ്രതിഷേധം ഉണ്ടാകുമെന്നും നേതാക്കള് പറഞ്ഞു. അരുവാപ്പുലം ഗ്രാമ പഞ്ചായത്ത് പ്രസിഡന്റിന്റെ പദവി ഇത്തരത്തിൽ ദുരുപയോഗം ചെയ്യുന്നത് പഞ്ചായത്തിനുകൂടി നാണക്കേടാണെന്ന് അവര് പറഞ്ഞു.
