തിരുവനന്തപുരം : ക്ലിഫ് ഹൗസിന് മുന്നിലെ സമരം അവസാനിപ്പിക്കാതെ ആശാ വർക്കേഴ്സ്. പ്രവർത്തകർ ബാരിക്കേഡിന് മുന്നിൽ തുടരുന്നു. മുഖ്യമന്ത്രിയെ കാണാതെയും ആവശ്യങ്ങൾ പരിഗണിക്കാതെയും പിരിഞ്ഞു പോകില്ലെന്ന് പ്രവർത്തകർ പറയുന്നു. എസിപിയുമായി പ്രവർത്തകർ ചർച്ച നടത്തി, നിലപാട് അറിയിച്ചു. ഓണാറേറിയം വര്ധിപ്പിക്കുക, വിരമിക്കല് ആനുകൂല്യം നല്കുക, പെന്ഷന് നല്കുക എന്നീ ആവശ്യങ്ങള് ഉന്നയിച്ച് നടത്തുന്ന സമരം എട്ട് മാസം പിന്നിടുമ്പോഴാണ് ആശാ പ്രവര്ത്തകര് മാര്ച്ച് നടത്തിയത്. പിഎംജി ജംഗ്ഷനില് നിന്ന് തുടങ്ങി ക്ലിഫ് ഹൗസ് വരെയായിരുന്നു പ്രതിഷേധം.
പ്രവര്ത്തകരെ പോലീസ് ബാരിക്കേഡ് വെച്ച് തടഞ്ഞു. മൂന്നിലധികം തവണ ജലാപീരഗി പ്രയോഗിച്ചു. മുഖ്യമന്ത്രിയെ കാണാതെ തിരിച്ച് പോകില്ലെന്ന നിലപാടിലായിരുന്നു ആശ ഹെല്ത്ത് വര്ക്കേഴ്സ് അസോസിയേഷന്. സര്ക്കാര് നിയോഗിച്ച വിദഗ്ധ സമിതി ആശാ പ്രവര്ത്തകരുടെ പ്രശ്നങ്ങള് പഠിച്ച് റിപ്പോര്ട്ട് സമര്പ്പിച്ചിരുന്നു. മാസങ്ങള് കഴിഞ്ഞിട്ടും റിപ്പോര്ട്ട് പോലും പരിഗണിക്കാന് സര്ക്കാര് ഇതുവരെ തയ്യാറായില്ലെന്നും പ്രവര്ത്തകര് ആരോപിക്കുന്നു.
