വെള്ളൂര്‍ : കോട്ടയം ജില്ലയിലെ ഏക ഹയര്‍സെക്കന്‍ഡറി ബധിര വിദ്യാലയം ആയ വെള്ളൂര്‍ ഗ്രാമപഞ്ചായത്തിലെ അസീസി മൗണ്ട് നീര്‍പ്പാറ ഹയര്‍സെക്കന്‍ഡറി സ്കൂളിലെ വിദ്യാര്‍ഥികളുടെ ഭൗതിക സൗകര്യങ്ങള്‍ മെച്ചപ്പെടുത്തുന്നതിനു വേണ്ടി എംപിമാര്‍ക്ക് ഉള്ള പ്രാദേശിക വികസന ഫണ്ടില്‍ നിന്നും 15 ലക്ഷം രൂപാ അനുവദിച്ചതായി തോമസ് ചാഴികാടന്‍ എം പി അറിയിച്ചു. ഇതിന് ഭരണാനുമതി അടക്കമുള്ള നടപടികള്‍ പൂര്‍ത്തിയാക്കിയിട്ടുണ്ട്.
കേരളത്തിലെ തന്നെ രണ്ടാമത്തെ ബധിര വിദ്യാലയമായ അസീസി മൗണ്ട് നീര്‍പ്പാറ ഹയര്‍സെക്കന്‍ഡറി സ്കൂള്‍ 1968 ലാണ് പ്രവര്‍ത്തനം ആരംഭിച്ചത്. കേരളത്തിലെ ഏറ്റവും മികച്ച സ്പെഷ്യല്‍ സ്കൂളുകളില്‍ ഒന്നായ ഈ സ്കൂളിലെ ബധിര വിദ്യാര്‍ത്ഥികളുടെ ഭൗതിക സൗകര്യങ്ങള്‍ മെച്ചപ്പെടുത്തുവാന്‍ ഫണ്ട് അനുവദിക്കണമെന്ന് ആവശ്യപ്പെട്ട് പ്രിന്‍സിപ്പല്‍ സിസ്റ്റര്‍ റെന്നി ഫ്രാന്‍സിസ്, ഹെഡ്മിസ്ട്രസ് സിസ്റ്റര്‍ ലീന ഫ്രാന്‍സിസ്, പിടിഎ പ്രസിഡന്റ മോദിലാല്‍ തുടങ്ങിയവര്‍ എം പി ക്ക് നിവേദനം സമര്‍പ്പിച്ചിരുന്നു.
