പുതുക്കാട് : വീണ്ടും എടിഎം കവര്ച്ച. ഒരുമാസത്തിനിടെ രണ്ടു തവണയായി 1.74 ലക്ഷം രൂപ നഷ്ടപ്പെട്ടതായി പരാതി. എസ്ബിഐ തൊറവ് ശാഖയുടെ എടിഎം സെന്ററിലാണു കവര്ച്ച. ബാങ്ക് അധികൃതര് സിസിടിവി ദൃശ്യങ്ങള് സഹിതം പുതുക്കാട് പോലീസില് പരാതി നല്കി. എടിഎമ്മില് പണം നിക്ഷേപിക്കുന്ന കൗണ്ടറില് നിന്നാണ് പണം തട്ടിയിരിക്കുന്നത്. തുക നിക്ഷേപിച്ചശേഷം മെഷീനില് സാങ്കേതിക തകരാര് ഉണ്ടാക്കിയാണു തട്ടിപ്പെന്ന് പുതുക്കാട് പോലീസ് എസ്എച്ച്ഒ യു.എച്ച്. സുനില്ദാസ് പറഞ്ഞു.
ജൂണ് 28, ജൂലൈ 28 ദിവസങ്ങളിലാണ് തട്ടിപ്പ് നടത്തിയിരിക്കുന്നത്. ബാങ്ക് അധികൃതര് പരാതി നല്കിയതിനെ തുടര്ന്ന് പുതുക്കാട് പോലീസ് ചൊവ്വാഴ്ച കേസ് രജിസ്റ്റര് ചെയ്തു. ഇതേ രീതിയില് തട്ടിപ്പുകള് മറ്റിടങ്ങളില് നടന്നിട്ടുണ്ടോയെന്നു ബാങ്ക് അധികൃതരും പോലീസും അന്വേഷിക്കുന്നുണ്ട്. മാസങ്ങള്ക്കു മുന്പ് പുതുക്കാട് ദേശീയപാതയ്ക്കു സമീപത്തെ മറ്റൊരു എടിഎം കൗണ്ടറിലും കവര്ച്ച നടന്നിരുന്നു. അന്ന് ഇതരസംസ്ഥാനക്കാരായ രണ്ടുപേരാണു പിടിയിലായത്.
