തിരുവനന്തപുരം : തിരുവനന്തപുരം വിഴിഞ്ഞത്ത് ഇതര സംസ്ഥാന തൊഴിലാളിയെ മര്‍ദ്ദിച്ചു. ജാര്‍ഖണ്ഡ് സ്വദേശി ഗൗതം മണ്ഡലിനാണ് മര്‍ദനമേറ്റത്. മുക്കോല ഓട്ടോ സ്റ്റാന്‍ഡിലെ സുരേഷാണ് മര്‍ദിച്ചത്. ഇതര സംസ്ഥാന തൊഴിലാളി പരാതി നല്‍കിയില്ലെന്ന് പറഞ്ഞ പോലീസ് കേസെടുത്തിട്ടില്ല. ഗൗതം മണ്ഡൽ ജോലി കഴിഞ്ഞ് മുക്കോലയിലെ മൊബൈൽ കടയിൽ റീചാർജ് ചെയ്യാനെത്തിയതായിരുന്നു. ഇതിനിടെ അശ്രദ്ധമായി ഓട്ടോ പിന്നിലേക്ക് എടുത്ത സുരേഷ് ഗൗതമിനെ അസഭ്യം പറയുകയായിരുന്നു. അസഭ്യം പിന്നീട് മര്‍ദ്ദനത്തിലേക്ക് മാറി.
കടയുടമയും അവിടെയുണ്ടായിരുന്നവരും നോക്കി നില്‍ക്കെയായിരുന്നു മര്‍ദനം. ഇതര സംസ്ഥാന തൊഴിലാളിയില്‍ നിന്ന് തിരിച്ചറിയല്‍ കാര്‍ഡ് തട്ടിയെടുക്കുകയും ചെയ്തു. സുരേഷ് കഞ്ചാവിനടിമയാണെന്നും പതിവായി അക്രമ സ്വഭാവം പ്രകടിപ്പിക്കുന്നയാളാണെന്നും നാട്ടുകാര്‍ പറയുന്നു. കഴിഞ്ഞ ദിവസവും മറ്റൊരു ഇതര സംസ്ഥാന തൊഴിലാളിയെ സുരേഷ് മര്‍ദ്ദിച്ചിരുന്നുവെന്നും നാട്ടുകാര്‍ പറഞ്ഞു .
