കൊച്ചി : ലഹരി ഉപയോഗിച്ച് പ്രശ്നമുണ്ടാക്കിയ യുവാക്കളെ കസ്റ്റഡിയിലെടുക്കാൻ എത്തിയ പൊലീസ് ഉദ്യോഗസ്ഥർക്ക് നേരെ കൊച്ചിയിൽ ആക്രമണം. മരോട്ടിച്ചോടിൽ നടന്ന സംഭവത്തിൽ തൃക്കാക്കര സിഐ വിമോദിന്റെ കൈക്ക് പരിക്കേറ്റു. സിഐയുടെ വിരലിന് പൊട്ടലുണ്ടെന്നാണ് പ്രാഥമിക വിവരം. നാട്ടുകാർ നൽകിയ പരാതിയെത്തുടർന്ന് സ്ഥലത്തെത്തിയ സിഐയെയും സംഘത്തെയും യുവാക്കൾ തടയുകയും കയ്യേറ്റം ചെയ്യാൻ ശ്രമിക്കുകയുമായിരുന്നു. പൊലീസ് വാഹനത്തിന് മുൻപിൽ നിന്ന് പരാക്രമം നടത്തിയ യുവാക്കൾ, “നിങ്ങൾ ജനങ്ങളുടെ സർവന്റ്സ് ആണ്, ഞങ്ങൾ അടക്കുന്ന നികുതി പൈസ കൊണ്ടല്ലേ നിങ്ങൾ ഭക്ഷണം കഴിക്കുന്നത്” എന്ന് ആക്രോശിച്ചതയാണ് റിപ്പോർട്ട്.
പൊലീസിനെ അവിടെ നിന്ന് പോകാൻ അനുവദിക്കാതെ തടഞ്ഞുനിർത്തുകയും പ്രശ്നം പരിഹരിച്ചിട്ട് പോയാൽ മതി എന്ന് ആവശ്യപ്പെടുകയും ചെയ്തു. സംഭവവുമായി ബന്ധപ്പെട്ട് അഞ്ച് യുവാക്കളെ പൊലീസ് കസ്റ്റഡിയിലെടുത്തു. ഇവർ സമീപത്തെ മാളിൽ ജോലി ചെയ്യുന്നവരാണെന്ന് തിരിച്ചറിഞ്ഞിട്ടുണ്ട്. കസ്റ്റഡിയിലെടുക്കുന്ന സമയത്ത് ഇവർ മദ്യപിച്ചിരുന്നതായും ഔദ്യോഗിക കൃത്യനിർവ്വഹണം തടസ്സപ്പെടുത്തിയതടക്കമുള്ള വകുപ്പുകൾ ചുമത്തിയാണ് കേസെടുത്തിരിക്കുന്നതെന്നും പൊലീസ് അറിയിച്ചു.
