തിരുവല്ല : കുട്ടികുരങ്ങനെക്കൊണ്ട് ചുടുചോർ മാന്തിക്കുക എന്ന് പറയുന്നതു പോലെ കെ.എസ്.യു കുട്ടികളെക്കൊണ്ട് വനിതാ മന്ത്രിയെ ആക്രമിപ്പിച്ച കോൺഗ്രസ് നേതൃത്വത്തിന്റെ ഹീന പ്രവർത്തനം അങ്ങേയറ്റം
ലഞ്ജാകരവും അപലപനീയവുമാണെന്ന് കേരള കോൺഗ്രസ് (എം) തിരുവല്ല നിയോജകമണ്ഡലം ജനറൽ സെക്രട്ടറി ബിജു നൈനാൻ മരുതുക്കുന്നേൽ പറഞ്ഞു. ഏതാനും ദിവസങ്ങളായി ഇടതുപക്ഷ ജനാധിപത്യ മുന്നണി സർക്കാരിനെതിരെ യുഡിഎഫ് ഓരോ ആരോപണങ്ങൾ ഉന്നയിക്കുമ്പോഴും കേരളത്തിലെ ജനങ്ങൾ കഴിഞ്ഞ യുഡിഎഫ് ഭരണകാലവുമായി അതിനെ താരതമ്യം ചെയ്യുന്നതാണ് നാം കണ്ടുകൊണ്ടിരിക്കുന്നത്.
ആരോഗ്യ മേഖലയുമായി ബന്ധപ്പെട്ട് കഴിഞ്ഞ ദിവസം റിപ്പോർട്ട് ചെയ്യപ്പെട്ട നിർഭാഗ്യകരമായ സംഭവത്തിന്റെ പേരിൽ കേരളത്തിലെ പൊതു ആരോഗ്യരംഗം ആകെ താറുമാറായി എന്ന രീതിയിലാണ് യു.ഡി.എഫ് പ്രചരിപ്പിക്കുന്നത്. സ്വകാര്യ ആശുപത്രി ലോബിയെ സഹായിക്കുവാൻ വേണ്ടി യുഡിഎഫ് ആരംഭിച്ച പ്രചരണം കേരളത്തിലെ പ്രബുദ്ധരായ ജനങ്ങള് തിരിച്ചറിഞ്ഞുകഴിഞ്ഞാല് തങ്ങൾക്കെതിരേ ശക്തമായ പ്രതിഷേധം ഉണ്ടാകുമെന്ന് മനസ്സിലാക്കിയതോടെ ജനശ്രദ്ധ തിരിച്ചു വിടാൻ വേണ്ടി നടത്തിയ ബോധപൂർവമായ ശ്രമമാണ് ഈ ആക്രമണമെന്നും ബിജു നൈനാൻ മരുതുക്കുന്നേൽ ആരോപിച്ചു.
