ചെങ്ങന്നൂർ : കൊല്ലകടവ് ഭാഗത്ത് വീടുകളിൽ കയറി അക്രമം നടത്തുകയും ആൾക്കാരെ മർദ്ദിക്കുകയും ചെയ്ത പ്രതികൾ പോലീസ് വലയിൽ കുടുങ്ങി. കഴിഞ്ഞ ശനിയാഴ്ച വൈകിട്ട് മദ്യലഹരിയിൽ ആയിരുന്നു അക്രമം. ചെറിയനാട് കടയിക്കാട് കൊച്ചുമലയിൽ വീട്ടിൽ ആദർശ് (22), കടയിക്കാട് അതുൽ ഭവനത്തിൽ അനന്തു (അച്ചൂട്ടൻ 22) എന്നിവരെയാണ് വെണ്മണി പോലീസ് അറസ്റ്റ് ചെയ്തത്.ശനിയാഴ്ച വൈകിട്ട് ഗോൾഡൻ പാലസ് ഓഡിറ്റോറിയത്തിന് സമീപമുള്ള ഷെഫിൻ വില്ലയിൽ മുഹമ്മദ് ആസിഫ്, ഷെബി മൻസിലിൽ ആഷിഖ് മുഹമ്മദ്, പൊയ്കത്തുണ്ടിയിൽ ജലാൽ എന്നിവർ വീടിനു സമീപം നിൽക്കുമ്പോൾ മദ്യലഹരിയിലായിരുന്ന പ്രതികൾ ഇവരെ ചോദ്യം ചെയ്യുകയും അക്രമിക്കുകയായിരുന്നു.
അക്രമത്തിൽ നിന്നും രക്ഷപെടുന്നതിനായി വീടുകളിലേക്ക് ഓടിയവരെ പ്രതികൾ പിൻതുടർന്ന് ആക്രമിക്കുകയും വീട്ടുപകരണങ്ങളും ചെടിച്ചട്ടികളും കസേരകളും നശിപ്പിക്കുകയും ചെയ്തു. ചെങ്ങന്നൂർ ഡി.വൈ.എസ്.പി എം.കെ രാജേഷിന്റെ നേതൃത്വത്തിൽ വെണ്മണി പൊലീസ് സ്റ്റേഷൻ ഇൻസ്പെക്ടർ എസ്.എച്ച്.ഓ നസീർ.എ, സബ്ബ് ഇൻസ്പെക്ടർമാരായ ദിജേഷ്.കെ, ആന്റണി.ബി.ജെ എന്നിവരടങ്ങിയ സംഘമാണ് പ്രതികളെ പിടികൂടിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
