മണിമല: യുവതിയുടെ വീട് കയറി ആക്രമിച്ച കേസില് മൂന്നുപേരെ പോലീസ് അറസ്റ്റ് ചെയ്തു. നെടുംകുന്നം കണ്ണങ്കര അതുല് അനു (24), മണിമല അമ്പാട്ട് കോളനി കറിക്കാട്ടൂര് സെന്റര് ഓട്ടുപുരക്കല് അപ്പു എന്ന് വിളിക്കുന്ന പി.എസ്. ആദിത്യന് (19), മാന്തുരുത്തി ആഴാം ചിറയില് എ.കെ. അഖില് (23) എന്നിവരെയാണ് പോലീസ് അറസ്റ്റ് ചെയ്തത്.
പരാതിക്കാരിയുടെ ബന്ധുക്കള് കൂടിയായ പ്രതികള് കഴിഞ്ഞദിവസം പരാതിക്കാരിയുടെ വീട്ടില് നടന്ന ചടങ്ങില് പങ്കെടുത്തിരുന്നു. അതിനിടെ ഇവരുമായി വാക്കുതര്ക്കം ഉണ്ടാവുകയും തുടര്ന്ന് രാത്രി പ്രതികള് ആവലാതിക്കാരിയെയും അവരുടെ സഹോദരനെയും സഹോദരന്റെ ഭാര്യയെയും ആക്രമിക്കുകയായിരുന്നു. ആക്രമണത്തിന് ശേഷം ഇവര് സംഭവസ്ഥലത്തു നിന്ന് കടന്നു കളയുകയും ചെയ്തു. തുടര്ന്ന് ജില്ലാ പോലീസ് മേധാവി കെ. കാര്ത്തിക്കിന്റെ നേതൃത്വത്തിലുള്ള അന്വേഷണസംഘം പ്രതികളെ പിടികൂടുകയായിരുന്നു.
