കിളിമാനൂര്‍ : നാട്ടുവൈദ്യനെ വീട്ടില്‍ അതിക്രമിച്ച്‌ കയറി കൊലപ്പെടുത്താന്‍ ശ്രമിച്ച രണ്ടംഗ സംഘത്തെ പള്ളിക്കല്‍ പോലീസ് അറസ്റ്റ് ചെയ്തു. പള്ളിക്കല്‍ മൂതല മൂലഭാഗം പാറവിള പുത്തന്‍വീട്ടില്‍ നിസാം (42), തേവരുവിള വീട്ടില്‍ മനീഷ് (38) എന്നിവരാണ് അറസ്റ്റിലായത്. കഴിഞ്ഞ ചൊവ്വാഴ്ച ഉച്ചക്ക് 1.30നായിരുന്നു കേസിനാസ്പദമായ സംഭവം.
സംഭവത്തെക്കുറിച്ച്‌ പോലീസ് പറയുന്നതിങ്ങനെ – നെടുമങ്ങാട് സ്വദേശി മൂതല വഞ്ചിമുക്ക് കുറ്റിമൂട്ടില്‍ വാടകക്ക് താമസിക്കുന്ന നാട്ടുവൈദ്യന്‍ നാസറുദ്ദീന്റെ (57) വീട്ടില്‍ ചികിത്സക്കെത്തിയ പെണ്‍കുട്ടിയുടെ ഫോണ്‍ നമ്പര്‍ നല്‍കാത്തതിലുള്ള വിരോധം മൂലം പ്രതികള്‍ വീട്ടില്‍ അതിക്രമിച്ചുകയറി 11,000 രൂപ വിലയുള്ള മൊബൈല്‍ ഫോണ്‍ പിടിച്ചുവാങ്ങിയശേഷം അസഭ്യം വിളിക്കുകയും ഭീഷണിപ്പെടുത്തുകയും മര്‍ദ്ദിക്കുകയും കത്തിയെടുത്ത് കുത്തി കൊലപ്പെടുത്താന്‍ ശ്രമിക്കുകയും ചെയ്തു.
വൈദ്യര്‍ പള്ളിക്കല്‍ പോലീസില്‍ പരാതി നല്‍കി. കേസ് രജിസ്റ്റര്‍ ചെയ്ത പോലീസ് അന്വേഷണം നടത്തി പ്രതികളെ പിടികൂടുകയായിരുന്നു. പള്ളിക്കല്‍ സ്റ്റേഷന്‍ ഓഫിസര്‍ പി. ശ്രീജിത്തിന്റെ നേതൃത്വത്തില്‍ എസ്.ഐ എം.സാഹില്‍, എസ്.ഐ ബാബു, എ.എസ്.ഐ സജിത്ത്, സി.പി.ഒ സുജിത്, അജീസ്, ബിജുമോന്‍ എന്നിവരടങ്ങുന്ന സംഘമാണ് പ്രതികളെ പിടികൂടിയത്. ആറ്റിങ്ങല്‍ കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.
