റാന്നി: തിരുവാഭരണ പാതയിലെ പേങ്ങാട്ട് കടവ് റോഡിൽ പാലത്തോട് ചേർന്ന് അപകടം പതിയിരുന്നിട്ടും അധികൃതർക്ക് അനക്കമില്ല. പാലത്തിന്റെ പ്രവേശനപാത തുടങ്ങുന്നിടത്തെ കോണ്ക്രീറ്റ് ഇളകി ഇരുമ്പ് കമ്പികള് തെളിഞ്ഞ നിലയിലാണ്. തിരുവാഭരണ പാതയിൽ പേങ്ങാട്ടുകടവിൽ ഇടക്കുളം ഉൾപ്പെട്ട കരയിൽ താമസിക്കുന്നവർക്കു വടശേരിക്കരയിലേക്ക് എത്താന് പ്രയോജനകരമാണ് പാലം. തിരുവാഭരണ യാത്രയില് നദി മുറിച്ചു കടക്കുന്നതില് ബുദ്ധിമുട്ടായിരുന്നു. ഇവിടെ പാലം വന്നതോടെ ഇതിന് പരിഹാരമായിരുന്നു. തിരുവാഭരണ പാതയുടെ പുനർനിർമ്മാണവുമായി ബന്ധപ്പെട്ടായിരുന്നു നിര്മ്മാണം. മുമ്പ് തിരുവാഭരണ യാത്രയിൽ നദികടക്കാൻ താത്കാലിക പാലം നിർമ്മിച്ചത് ഒലിച്ചുപോയ വർഷമാണ് പാലം വരുന്നത്.
നിർമ്മാണത്തിന്റെ തകരാർ ആണ് കമ്പി തെളിയുകയും കോൺക്രീറ്റ് നഷ്ടപ്പെടുകയും ചെയ്തിനു കാരണം. ഇരുചക്ര വാഹനത്തില് യാത്ര ചെയ്യുന്നവർ ഗർത്തത്തിൽ വീണ് അപകടം സംഭവിക്കാനും ജീവൻ നഷ്ടപ്പെടാനും സാധ്യത കൂടുതലാണ്. വാഹനങ്ങള് പാലത്തിലേക്ക് കയറുമ്പോഴുള്ള പ്രകമ്പനത്തില് അടിയിൽ നിന്നും മണ്ണ് ഇളകി മാറുന്നുണ്ട്. വിടവ് വലുതായാൽ ആളുകൾ ഉള്ളിൽ അകപ്പെടാനും സാധ്യത കൂടുതലാണ്. വലിയ ദുരന്തം സംഭവിക്കുന്നതു വരെ അധികൃതർ കാത്തിരിക്കാതെ അടിയന്തിര നടപടി സ്വീകരിക്കണമെന്ന ആവശ്യം ശക്തമാണ്.
